Credencialnan di e 8 parlamentarionan nobo a wordo aproba

Parlamentarionan a retira como parlamentario pa huramenta como minister

ORANJESTAD (AAN):  Na Parlamento diahuebs mainta a tuma luga e reunion riba un punto di agenda cu ta ‘Onderzoek geloofsbrieven en toelating als leden der Staten’ (verificacion di e credencialnan y e admision di e miembronan di Parlamento).

E Parlamentarionan den Parlamento number 11 cu lo huramenta como minister di Gabinete Wever-Croes II, a tuma nan retiro como parlamentario.

Presidente di Parlamento, Edgard Vrolijk a laga sa cu pa esaki a nombra tres persona cu a atende cu e comision pa controla e credencialnan pa locual ta e ocho parlamentarionan nobo.

E tres personanan aki tabata Evelyn Wever-Croes, Ryçond Santos Do Nascimento y Geoffrey Wever.

Griffier a haci entrega na e comision di e credencialnan y e comision a repasa esakinan pa despues e presidente di e comision cu tabata Evelyn Wever-Croes a duna di conoce cu tur e credencialnan tabata cumpli cu tur e exigencianan pa por ta parlamentario.

E credencialnan aproba tabata pa e parlamentarionan:

- Juan E. Thijsen (MEP)

- Loisette J. Christiaans - Yarzagaray (MEP)

- Shailiny M. Tromp - Lee (MEP)

- Darlene B. Guedez - Erasmus  (MEP)

- Alvin S. C. Molina (MEP)

- Marco Antonio Berlis (MEP)

- Raymichelline M.J. Raymond (RAIZ)

- Raymond A. Kamperveen (RAIZ)

E siete rekisitonan cu tabata wordo exigi a wordo controla y a constata cu den tur e casonan aki ta cumpli cu tur e siete rekisitonan.

Evelyn Wever-Croes a agrega cu e comision kier a duna un recomendacion pa ora ta trata e punto 4, pa den caso cu un candidato ta un ambtenaar y na momento cu e bira parlamentario e no tin e funcion di ambtenaar mas, pa toch haci un mencion di dje den e lista presenta, cu el a meld esaki na su doño di trabao cu e no ta un ambtenaar mas of cu e ta bay bira un parlamentario y cu e ta cumpli completamente cu esaki.

Den e caso aki, e comision no a haya motibo pa bisa cu nan no ta cumpli. Nan ta cumpli cu e rekisitonan y cu e informacion cu e comision a haya di griffier tambe.

Presidente di Staten, Edgard Vrolijk a felicita e parlamentarionan cu awe pa 9 di mainta ta wordo huramenta.

Vrolijk a remarca e parlamentarionan nobo pa keda prepara pasobra na cualkier momento e trabaonan ta inicia ya cu awe diabierna mes ta drenta Parlamento e Landsbesluit cu ta regarda e terminacion di e ciclo di e ministernan y despues di esey tin cu yama un otro reunion publico pa atende cu esnan cu lo mester bira minister.