Na forma alarmante Covid-19 ta ataca muchanan no vacuna - Mucha y hoben ta e cambio grandi den desaroyo di e malesa - Medidanan urgente pa frena progreso di Covid-19 na schoolnan
ORANJESTAD(AAN)- Na momento cu Covid-19 a presenta su mes na mundo, a wordo pensa cu e no ta un peliger grandi pa mucha.
Yegando final di 2021, mundo ta wordo confronta cu un atake serio di e malesa riba muchanan y hobennan, cu ta wordo hospitalisa y hasta por bira victima fatal di Covid-19.
Scol- y lugarnan cu muchanan ta frecuenta, ta bira centronan nobo di contagio di Covid-19.
E variante Delta ta plama cu velocidad rond mundo cu ta registra un aumento preocupante y cu velocidad halto di mucha y hobennan.
Cera schoolnan no ta wordo considera un opcion na hopi pais, pero school ta birando fuente di e progreso di Covid-19 entre mucha.
E hecho cu den e plan di vacunacion di mundo no a inclui mucha y hobennan, awe tin como resultado, cu nan ta bira e atraccion mayor pa e malesa y sigur e variante Delta.
Segun expertonan cu DIARIO a consulta den e desaroyonan sumamente preocupante, muchanan no a haya oportunidad di proteha nan mes na mes forma cu adultonan.
Mundo generalmente no a adapta su mes na cambionan pero tambe a bandona hopi medida preventivo cu a wordo tuma na inicio di e pandemia y cu awor cu vacunacion di adultonan ta den progreso, ta wordo geschrap.
Mencion ta wordo haci di e hecho cu na principio di e pandemia, hopi atencion tabata wordo dedica na entre otro contacto personal.
Medidanan severo cu a wordo tuma originalmente pa evita cu e malesa ta plama na school y centronan caminda muchanan ta acudi, a wordo retira na hopi pais.
Na e momentonan aki, e variante Delta ta plama na forma sumamente alarmante y informacionnan cu ta alcansa DIARIO for di hopi pais grandi sigur ta motibo pa pidi Aruba tambe pa tuma tur medida di precaucion necesario pa evita e brote nobo di Covid-19 cu den e muchanan no vacuna, ta sigui plama.
E velocidad cu cual contagio entre mucha ta tuma lugar tambe ta di preocupacion grandi.
Si na inicio tabata pensa cu e malesa no ta causa problema serio pa mucha, mas y mas por mira mucha hospitalisa sin cu nan tabata tin condicionnan medico special prome cu nan a wordo infecta.
E forma cu Covid-19 ta afecta muchanan tin resultado pa school y centronan di mucha, cu na cantidad di pais ya no ta manda tur mucha cas ora infeccion tuma lugar. Esaki ta haci cu un caso por sigui percura pa den un tempo cortico, e cantidad di mucha afecta aumenta seriamente.
E problemanan di salud cu muchanan cu Covid-19 mester confronta ta importante pa menciona tambe. E cantidad di mucha cu a bira victima fatal di Covid-19 ta aumenta.
“Urgentemente mester adapta e posicion enfrente mucha y Covid-19” informantenan a bisa DIARIO ya cu e velocidad cu cual e malesa ta progresa, ta motibo di preocupacion debi na e impacto cu e tin riba bida familiar.
Mester tin mayor na cas cu mucha cu a wordo infecta dor di Covid-19 loke ta resulta den problemanan laboral.
Mester yega na decisionnan pa e forma cu centronan di actividad di mucha ta atende cu e situacion nobo.
DIARIO lo sigui presenta mas desaroyo importante di cambionan cu cual mndo ta wordo confronta den e situacion di Covid-19 cu awe a bira peliger pa mucha y hoben!
