Comunidad mester duna mas atencion na e realidad cu mundo ta enfrenta - *E pregunta grandi no ta si por sigui celebra Carnaval ni con por sigui baila - *Pueblo mester realisa e retonan y problemanan serio cu ta spera den futuro
ORANJESTAD (AAN) — Kico futuro lo trece pa Aruba y mundo? Un contesta pa e pregunta aki ta keda ausente!
Gobiernonan rond mundo mester sigui planifica pero e cambionan cu tur planificacion na mundo por conoce den futuro directo, ta crece cu cada dia cu pasa.
Hende mester cuminsa dedica atencion directo na e dos menasanan grandi cu ta cubri pa incertidumbre total hasta di parti di mundo cientifico pa e simpel motibo cu hende mester actua awor na un forma responsabel.
Covid-19 ta un calamidad cu lo sigui crece mientras hende mes no coopera y cuminsa realisa kico por ta e panorama mundial na 2022.
Pa loke ta trata Aruba e realidad ta, cu na e momentonan aki tin 15 persona den Cuido Intensivo na Aruba y 24 persona den Cuido Intensivo na Colombia.
Esaki ta nifica cu Aruba mester tene cuenta cu tin 39 persona di Aruba den situacion critico cu por resulta den morto causa pa Covid-19.
E hecho cu Aruba ta manda pashentnan pa Colombia ta nifica, cu Aruba mester tene cuenta tambe cu gastonan inespera den situacionnan lamentabel cu por surgi ora mester traslada restonan mortal di personanan cu ta perde e lucha contra e pandemia.
Covid-19 tin mas resultado pisa pa mundo, cu ta sigui confronta problemanan serio riba tereno financiero y economico loke ta haci cu na cierto momento pobresa y tur loke ta contra interes di hende ta subi.
Esaki hustamente lo tuma luga na momento cu e cambio di clima lo exigi gastonan enorme cu desastrenan natural lo ocasiona.
Ya na 2021 por a tuma nota di un aumento enorme di desastre natural y tur e resultadonan financiero y economico cu esaki tin ademas di e cantidad di bida cu e ta exigi.
Cambio di clima ta bay afecta e sistema actual di mundo y mester cuminsa atende cu e tema aki na Aruba tambe.
Tur comunidad na mundo mester cuminsa realisa kico 2022 lo exigi di hende, cu lo no a bandona e pandemia di Covid-19 manera a wordo spera debi na e hecho cu e cantidad di hende cu a pensa cu ya lo a ricibi nan vacuna, no a wordo alcansa.
Mundo ta enfrenta 2022 cu cantidad di protesta cu hende cu kier nan libertad pa haci y deshaci manera nan kier.
Ayera a cera cu lidernan gubernamental rond mundo buscando solucionnan pa un futuro directo, den cual e margen di certidumbre cu ta conduci na stabilidad y ta haci planificacion posibel, ta wordo afecta pa dos asunto cu mundo te ainda no por controla cu ta Covid-19 y cambio di clima, cu lo por trece cambio serio den loke awe hende ta tuma como asuntonan garantisa!
