Acuerdo cu Hulanda pa supervision a bira inspiracion politico - *For di su posicion fastioso den Parlamento Miguel Jose den accion - *Ora AVP mester habri boca den Parlamento e ta mester briya pa ausencia
ORANJESTAD (AAN) — Manera por a spera e acuerdo cu Gobierno Evelyn Wever-Croes a alcansa cu Hulanda pa loke ta trata supervision Hulandes, a habri caminda pa partidonan di oposicion pisca voto.
Partidonan cu no ta parti di e formacion di un gobierno nobo ni di e gobierno saliente di Evelyn Wever-Croes, a haya un oportunidad pa bini dilanti na nan interes politico.
Miguel Jose Mansur a presenta su mes como lider di fraccion di Accion 21, loke sin duda e ta den su situacion unico den Parlamento.
Miguel Jose Mansur mester keda lider di fraccion di Accion 21 si e kier evita cu e asiento di su partido Accion 21, ta pasa pa Daphne Lejuez cu no ta miembro di Accion 21 mas y asina Accion 21 despedi di Parlamento prome cu Aruba bolbe urna electoral.
Miguel Jose Mansur ya a skirbi historia den Parlamento na momento cu e dos personanan cu ta sigui su persona riba lista di su partido, a lague den soledad den e olanan sumamente bruto cu Accion 21 mester sobrebibi.
Esaki ta nifica cu ni e personanan mes cu tabata parti mas importante riba lista di candidato di e partido di Miguel Jose, mes ta kere den su persona como un representante pa Pueblo di Aruba.
Awor Miguel Jose ta manda un carta pa pidi Presidente di Parlamento pa habri porta pa e reuni cu Director di Asuntonan Financiero di Aruba pa asina Miguel Jose por repasa e “financial modelling” cu a wordo uza pa e acuerdo Hulandes pa supervision.
Di e forma aki Miguel Jose Mansur ta busca atencion den su situacion poco dificil y solitario den e fraccion di un persona di Accion 21, cu ta stop di conoce representacion pues den Parlamento di Aruba na momento cu e dos candidatonan despues di Miguel Jose Mansur riba lista di Accion 21, haya oportunidad pa reemplasa Miguel Jose.
Manera por a spera AVP tambe a mira un oportunidad pa reacciona despues di e acuerdo cu Hulanda.
Aparentemente AVP mester di un “refreshment course” pa por refresca su mente pa asina e no lubida pakico Aruba ta haya su mes cu supervision cu ta e resultado indiscutibel di Gobierno Mike Eman, e persona cu te awe ta dirigi AVP y porfin a dicidi di stop di sconde y a bolbe drenta Parlamento.
Awe AVP mester bay puntra Mike Eman kico ta supervision y pakico el a bay muri di hamber den Fort Zoutman ora Hulanda a bati na porta hopi tempo prome cu pandemia a ataca Aruba, cu Mike Eman a laga den estado di bancarota.
Ta cu interes mester sigui e maniobranan di Accion 21 di Miguel Jose Mansur cu mester di un “raft”, un forma pa scapa den e lama bruto cu su partido y su persona mester sobrevivi.
Ta cu interes mester sigui e wega di AVP, cu mester di un refresco pa recorda cu ta nan lider Mike Eman a hinca Aruba den man di supervision Hulandes.
