Frontera Aruba y Venezuela por lo pronto cera te December 2021 - Socialista Maduro ta huur negoshi di cuminda cu companianan priva - Pueblo di Aruba ta keda na fabor frontera cera den situacion actual
ORANJESTAD(AAN)- E situacion inhumano cu a apodera di Venezuela bou regimen di Hugo Chavez y Nicolas Maduro, nunca a conoce un solucion.
Juan Guaido no a logra trece e cambio cu el a pensa prome cu Donald Trump a baha como Presidente Mericano y e pandemia Covid-19 a kita tur atencion for di e drama social cu a continua na Venezuela.
Sucesonan relaciona cu Nicolas Maduro a perde atencion den publicidad mundial den e lucha contra e pandemia. Poco informacion a bini dilanti di e realidad di pueblo di Venezuela, cu a keda pega den e desastre socialista crea pa Chavismo y socialismo Cubano.
E peliger den porta di Aruba te awe ta existi mientras Nicolas Maduro ta busca problema cu Guyana na frontera entre e dos paisnan.
Hopi Venezolano no tin tempo pa presta atencion na e ultimo desaroyonan ya cu nan ta lucha cu nan sobrevivencia den condicionnan dramatico di bida, cu ta haci cu un cantidad ta huy for di Venezuela pa busca otro cas na mundo.
Pero tin tambe amigonan di Nicolas Maduro cu ta haci uzo di e oportunidad cu condicion di refugiado ta brinda na personanan cu ta huy di realidad di Venezuela cu a keda un peliger pa seguridad di e region Caribense y Latino Americano.
E pais na man di Nicolas Maduro nunca a logra recupera di su caida economico cu na man di socialismo a transforma e pais productor di petroleo den un poz di miseria y hamber.
Awe cuminda a bira un negoshi nobo cu Nicolas Maduro a inventa. Companianan di gobierno cu ta atende cu cuminda pa Pueblo a haya su permiso pa huur nan negoshi cu companianan priva.
Pa 16 Mil Dollar mensual un compania priva por huur un negoshi cu ta produci por ehempel funchi y percura pa produccion cu e gobierno socialista di Nicolas Maduro mes no por atende.
E situacion di Venezuela ta motibo di preocupacion pa hopi Arubiano cu no ta na fabor pa Gobierno habri portanan entre Venezuela y Aruba debi na e hecho cu esaki ta nifica tambe habri porta pa crimen.
No solamente mundo liber ta sigui pasonan di e grupo directamente mara na Nicolas Maduro cu posibilidad grandi di criminalidad.
E situacion miserabel cu ta parti di mayoria na Venezuela ta fomenta actonan clandestino, cu den e lucha pa sobrevivencia di hende ta bini dilanti.
Hopi Arubiano ta biba cu e miedo cu lama ta permiti condicionnan cu na forma ilegal ta bira entrada pa Aruba, cu pa un gran parti ta di acuerdo pa tene e fronteranan cera sigur teniendo na consideracion e problemanan grandi cu Aruba tambe ta enfrenta for di momento cu Covid-19 a haci su entrada.
Cu Pueblo di Venezuela merece un solucion pa e situacion na e pais, no ta laga lugar na duda. Aruba a sostene intentonan mundial pa Venezuela a bandona e dictadura di Nicolas Maduro, cu ta un peliger pa henter e region.
Aruba, sinembargo, no por soluciona un problema na un pais mucho mas grandi cu Aruba y cu condicionnan cu ta stroba mundo di haya un bista real di por ehempel e contagio di Covid-19.
Comunidad internacional cu tin e formanan necesario mester actua pa un dia democracia permiti Venezuela brasa pa un futuro a base di e rikesanan cu a wordo entrega na e Pueblo Venezolano na momento di su creacion.
