ORANJESTAD (AAN) – Den e parti final di su Discurso entorno e apertura di Aña Parlamentario 2021-2022, Gobernador Alfonso Boekhoudt a enfoca riba aspectonan cu ta regarda derechonan humano,
salubridad publico cu enfasis riba e pandemia (covid-19) y alternativanan pa Aruba recupera, entre otro, sigui cu vacunacion.
“E derechonan fundamental di bida y di dignidad humano a haya nan mes bou di presion durante di e pandemia. Maneho di migracion mester conecta miho riba nos necesidadnan economico y alavez frena migracion ilegal y elimina violacion di derechonan humano door di trafico y contrabanda di persona. Esey ta nifica cu e proceso di permiso di estadia mester bira uno mas transparente; cu mas control na pia di trabao.
Pa garantiza salubridad publico a rekeri hopi esfuerzo cu e diferente olanan di infeccion cu nos a conoce. Aunke Gobierno ta sigui cu su esfuerzonan pa baha gasto, cuido medico adecuado y di calidad ta keda punto di salida. Lo promove un cooperacion mucho mas estrecho entre hospitalnan di Reino: conhuntamente lo haci e compra di medicina, material y aparatonan y fortifica e cooperacion entre e prome y di dos linea di cuido. Ademas lo sigui enfoca pa hisa e tasa di vacunacion contra COVID-19 pa asina Aruba por recupera.
Cu asistencia di PAHO y gruponan di interes a realiza un Plan Nacional di Prevencion pa asina promove un miho cuido medico y un miho calidad di bida. Lo introduci un plataforma digital pa registra indicadornan di malesanan no-transmisible, cual ta e causa principal di morto prematuro aki na Aruba. Hunto cu e instancianan concerni, lo prepara un plan integral pa brinda asistencia, guia y cuido na e adulto mayor, pa asina garantiza cuido responsabel y di calidad cu cada un tin derecho riba dje.
Hopi di nos ciudadanonan a traha incansablemente bao hopi presion pa duna yudanza na esnan den necesidad. Gobierno no solamente ta desea di expresa gratitud na e personanan aki pero tambe na tur esnan cu a traha hopi ora pa percura pa nos cuido medico, ordo publico, seguridad y otro areanan menos visible, pero no menos importante.
E pandemia a habri nos wowo mas ainda riba e importancia di educacion y creacion di acceso na informacion pa nos muchanan. Nos no por laga ningun hende atras. P’esey nos lo sigui percura pa nos muchanan sigui desaroya habilidad di siglo 21 y transforma nan den adultonan cu responsabilidad civico. Lo acelera innovacion den educacion y lo ehecuta e Plan Nacional di Enseñansa 2030. Lo evalua calidad di enseñansa y sincronisacion cu mercado laboral.
Hunto cu sector priva lo implementa e programa ‘Enseñanza di Segundo Oportunidad’ caminda dropouts por sigui studia of siña un vocacion practico di acuerdo cu e mercado laboral pa asina por ta ciudadanonan digno y exitoso.
Sr. Presidente,
Democracia no ta perfecto, pero ta e mihor sistema cu paisnan occidental a adopta pa ordena nan podernan ehecutivo y legislativo. Otro variantenan, sea na man drechi of man robes di e spectrum politico, no ta garantiza e libertadnan y biennan cu nos ta anhela asina tanto manera libertad di expresion, autodeterminacion, eleccionnan liber y derechonan humano. Institutonan y ciudadanonan ta yuda mantene e compleho aki den balansa constantemente.
Nos mester ta consciente cu e efectonan di un crisis di e caliber di COVID-19 y e consecuencianan cu e pandemia a trece cu ne, a mishi cu nos democracia te den su alma. Ta e cualidadnan humano manera solidaridad, convivencia, responsabilidad civico y hecho cu nos ta forma parti di Reino Hulandes a yuda y ta yudando nos surpasa e periodo aki. Nos parlamento ta hunga un rol sumamente importante den e proceso aki.
E hecho cu nos tur ta diferente y ta pensa diferente, no kiermen cu cada un mester bay su caminda separa. Pa nos Pais progresa, union ta necesario, pasobra trahando hunto nos ta mas fuerte, nos por logra solucionnan duradero y sostenible. Union no ta nifica cu nos mester pensa mescos. Cada ciudadano tin talentonan unico, cu tin un balor special, cu ta diferente di otro, pero conhuntamente lo haci Aruba progresa.
Sr. Presidente,
Mi ta declara, manera nos Constitucion ta prescribi, e aña parlamentario 2021-2022 pa habri. Cu Dios ilumina cada un di nos y guia nos pasonan pa bienestar y progreso di nos Pais”, Gobernador Alfonso Boekhoudt a conclui asina, su discurso.
