ORANJESTAD (AAN) – Den su discurso en conexion cu apertura di Aña Parlamentario 2021-2022, Gobernador Alfonso Boekhoudt tambe a elabora riba e temanan di recuperacion economico,
finanzas, educacion, seguridad, husticia, criminalidad, medio ambiente, desaroyo teritorial, entre otro, y kico ta e pasonan cu Gobierno lo bay tuma pa contraresta e retonan cu tin nos dilanti riba e diferente areanan di atencion aki.
“Un economia sano y capaz di absorbe efectonan externo, ta bay man den man cu un bon maneho riba finanzas publico. Aunke recuperacion di nos economia a cuminsa, nos no por yega por lo pronto na un presupuesto balansa. E sosten di likidez di Hulanda a alcanza e suma di 900 miyon florin caba y Gobierno ta premira cu den e prome cuartal di 2022 ainda lo mester haci un apelacion pa sosten financiero for di Hulanda den forma di un prestamo. Sinembargo, nos recuperacion economico ta determinante den esaki.
Mientras cu di un banda, lo sigui traha pa crea un cuadro financiero na nivelnan manehable door di baha gastonan innecesario y introduci reformanan, manera entre otro un reforma fiscal, manera recomenda pa Fondo Monetario International.
Di otro banda, e masterplan Reposicionando Rumbo di nos Pais lo ta e fundeshi pa desaroya y diversifica nos economia di un manera duradero y sostenible hunto cu sector priva. Gobierno lo ta pro-activo riba tereno economico cu e tarea principal di facilita inversion y produccion den consulta estrecho cu e sector. Tambe lo sigui tuma pasonan concreto pa e desaroyo di San Nicolas.
Nos stabilidad economico ta wordo complementa cu desaroyo di nos infrastructura fisico. Nos tur ta consciente cu no por permiti un desaroyo infrastructural sin combina esaki cu desaroyo teritorial y su efecto riba medio ambiente. Gobierno ta den proceso di formaliza e Plan di Desaroyo Teritorial cu Regulacion (ROPV) pa guia e desaroyo teritorial, door di aplica reglanan specifico relaciona cu e uso di e teritorio y awanan rond di Aruba.
Cu e meta pa busca un balansa entre desaroyo economico y proteccion di nos naturaleza y medio ambiente, otorgamento di tereno lo conoce un proceso transparente y husto pa e ciudadano.
Gobierno lo bin cu un maneho specifico pa yega na un solucion permanente pa e proceso di separa, procesa y reduci desperdicio, tanto solido como likido. Esey mester conduci na saneamento di e dumpnan na Parkietenbos y Sero Thijshi, como tambe restructura e sistema di plantanan di tratamento di awanan sushi na Bubali. Un maneho ambiental duradero ta solamente posibel si e comportacion humano ta corecto. Esencial den esaki ta educacion y conscientizacion, cuminsando for di tempran na scol.
Señor Presidente,
Aruba tin mester di sistemanan di gestion publico den cua tur esnan responsabel – nos institutonan, organizacionnan publico, semi-publico y priva, ta duna cuenta y ta tene nan mes na nos leynan. Gobierno ta compromete su mes pa traha cu e gruponan di interes cu atencion special pa e derechonan di nos muchanan, nos grandinan y esnan cu capacidadnan limita.
Criminalidad bao di nos hobennan, violencia domestico y abuso sexual contra nos muchanan y hobennan ta keda alarmante. Ta sumamente importante pa seguridad y trankilidad di cada ciudadano wordo garantiza. Conhuntamente cu e organizacionnan activo den e ramo aki lo traha riba diferente programa pa combati e fenomeno aki.
Lo percura pa mas accesibilidad di ayudo profesional y lo enfoca riba e gruponan mas vulnerabel den nos comunidad. Un pueblo cu ta mira husticia prevalece, ta experiencia esaki como un recompensa di democracia.
Enseñansa, deporte y cultura mester brinda perspectiva un biaha mas pa nos muchanan y hobennan. Den un fase tempran mester pone atencion riba e factornan cu por conduci cu nan ta bay den mal caminda. E formacion di e mucha y e hoben mester tuma luga na cas, den e bario y na scol, cu enfoke riba norma y balornan. Central den e maneho di Gobierno ta keda e ser humano, specialmente pa resolve e problemanan social hunto cu e organisacionnan activo riba e terenonan aki. Lo continua cu un maneho integral pa yuda forma nos muchanan y hobennan di e mihor manera y combati e problemanan cu mas efectividad.
Lo haci tur esfuerzo pa crea un ambiente mas sigur cu un plan di accion mas agresivo den prevencion di criminalidad invirtiendo mas den cuerponan di orden publico y dunando nan e hermentnan necesario pa por combati criminalidad efectivamente. Gobierno lo evalua solucionnan preventivo. Controla pa Ministerio Publico y dentro di maneho di Husticia, lo amplia e poder investigativo di cuerpo policial pa asina por actua mas eficiente ora cu mester. Asina tambe lo optimalisa e maneho strategico di nos instituto coreccional cu programanan dirigi na resocializacion di e presonan” Gobernador Boekhoudt a señala.
