Rosa Leon, Presidente Stichting Mantelzorg:
ORANJESTAD (AAN) – Rosa Leon, Presidente Stichting Mantelzorg, den su entrevista cu Matutino DIARIO, a expresa cu Covid-19 a haci nos comunidad mas asocial di locual tabata tey caba, den sentido cu “bo problema ta di bo y mi no ta mete den dje”.
“Mi ta kere cu nos mester bay den e parti mas humano, y por siña compronde e dolor di un otro persona, y duna un man na unda nos por. No bisa esey ‘cu bo no ta bay mete den problema di un otro persona’ pero ban, como comunidad, pa purba di sa si e persona ey awo t’asina, mañan por ta ami ta yega na un momento asina”, Rosa Leon a señala.
El a reitera cu nos mester por bira mas humano cu otro, y por siña balora cada trabao cu otro persona ta haci den e area di cuido.
“Mi ta kere cu si locual mi ta pasando den dje mi por ‘translate’ na un otro persona, cu tambe ta den e proceso ey, e lo bira mas comprensible pa e otro persona cu lo bay enfrenta e guia aki, mirando cu nos mester siña papia di problema, na Aruba.
Tin hopi tabu pa nos papia di locual nos ta pasando den dje, pa un otro persona no haya sa. Pero si nos papia di e problemanan mas comun, e ta bira mas facil pa nos por acepta e zorg cu nos mester bay deal cu ne”, Rosa Leon a subraya.
