Costo di renobacion di Cas di Cultura lo ta 17 miyon Florin

Tur hende por duna contribucion

ORANJESTAD (AAN): Durante un conferencia di prensa convoca na Cas di Cultura, Vicky Arens kende ta directora, a divulga cu renobacion di e lugar ta bay cuminsa.  Na final di tur e trabao aki, Cas di Cultura lo bay ta mas grandi cu dos pida extra construi tanto banda pabao, y tambe banda pariba.

   Pa e trabao aki mester di placa, y bon noticia ta cu Cas di Cultura ya caba a sigura partnershipnan y sponsornan fuerte pa sostene e proyecto ambicioso aki. Gobierno di Aruba, het Cultuurfonds Hulanda, Water- en Energiebedrijf Aruba (WEB), y Aruba Hotel & Tourism Association (AHATA) tur a compromete pa hunga un rol pa haci ‘E Brasa’ un realidad.

   Aruba Investment Bank (AIB) a compromete pa sostene e parti importante di maneha e fondonan di renobacion recauda di un manera resposabel y transparente. AIB a bin ta haci esaki pa decada caba di un manera hopi satisfactorio pa varios proyecto grandi na Aruba, incluyendo e JFK Center for Education situa banda di Cas di Cultura.

   Fuera di e asosiacionnan aki, e publico y negoshinan local tambe ta worde invita pa contribui. A introduci diferente fluho di donacion pa acomoda tur presupuesto y cartera, sigurando cu tur hende cu ta balora herencia cultural di Aruba por hunga un rol den e transformacion aki. Di e cartera mas chikito cu un donacion di algun Florin, te na e nivel di laga un legado atras cu contribucionnan mas grandi, cual ta ideal pa e aspecto di mercadeo pa empresanan, marcanan, pero tambe pa nombernan di famia cu kier pa nan sosten ta visto, como mecenas o patron di arte, anke por ta anonimo tambe. Tur contribucion ta conta, pasobra Cas di Cultura ta di nos tur.

   Costo di 17 miyon Florin: E costo total proyecta pa e renobacion completo ta 17 miyon Florin y a mustra con e presupuesto aki ta hinca den otro, calcula varios biaha y pa varios experto.

   E apoyo di 4 miyon na financiamento di gobierno anterior ta sirbi como fundacion pa e proyecto. Esfuersonan adicional pa recauda fondo, patrosinionan y contribucionnan di comunidad lo ta esencial pa trece E Brasa na finalisacion.

   E renobacion aki ta tocante mas cu djis modernisacion. E ta un compromiso pa conserva herencia cultural di Aruba pa futuro generacionnan.

   Cas di Cultura ta e curason di expresion artistico riba e isla pa mas cu seis decada, ofreciendo un plataforma pa talento lokal por crece y pa e comunidad por ta envolvi cu arte y nan identidad. Invertiendo den e proyecto aki, Aruba ta sigura un parti di su herencia cultural y su autenticidad. E sector cultural por sigui prospera door cu artistanan tin un escenario pa mustra nan talentonan y e legado artistico di Aruba ta worde honra.

   E restauracion y ampliacion di Cas di Cultura ta un paso critico pa reenforsa e poder colectivo di nos comunidad cual ta forma nos identidad nacional. Cas di Cultura ta netamente pa y di Aruba su pueblo y nos pueblo merece un lugar bunita di expresion cu ta p’e y di dje.

   Pa mas informacion riba ‘E Brasa’ y con pa sostene e iniciativa aki por bishita e website di casdicultura.aw tambe.