*Den cual costo di 2025 pa 2040 ta den perspectiva
ORANJESTAD (AAN) – Ursell Arends, Minister demisionario di Ministerio di Asuntonan di Adulto Mayor, den conferencia di prensa Diaranzon 5 di Maart aki, a elabora riba e tema “Asuntonan di Adulto Mayor”, unda specificamente a presenta un rapport cu, den colaboracion di tanto e Ministerio di Adulto Mayor como di Directie Ouderenzaken, recientemente el a ricibi.
E dignatario a bisa cu ya caba, for di Juli 2024 nan ta trahando riba dje, y e advies aki a wordo prepara door di AAG Financial Services di Hulanda, den cual nan ta pone e costo di cuido pa Adulto Mayor di 2025 te cu 2040, den perspectiva.
“E aña aki, den e presupuesto di 2025, nos tin un tiki menos di 30 miyon florin aloca pa cuido di adulto mayor. Segun mi, e advies di AAG e aña aki caba, pa duna e cuido na tur e adultonan mayor den nos comunidad cu mester di esaki lo mester tin un total di 3 miyon florin poni riba presupuesto p’asina aki nos por duna e cuido na adulto mayor. Un cuido di bon calidad, pagabel y mas cu tur cos accesibel” e dignatario a señala.
E mandatario a sigui splica cu e rapport aki, ya caba a wordo presenta na Conseho di Minister, y mi ta spera cu dentro di poco esaki tambe lo wordo presenta na Parlamento di Aruba p’asina aki e Parlamentarionan tambe tene na cuenta cu ora di bay trata presupuestonan di e aña aki, pero tambe esnan cu ta sigui, por cuminza pone e fondonan necesario pa por brinda e cuido di calidad na nos adultonan mayor.
“Mi mester bisa cu Directie Ouderenzaken desde 20 di October 2024 tin su directora y despues cu esaki a bira operacional a cuminza traha un team tambe y aworaki tin un grupo di ocho persona cu ta traha y ta mantene Directie Ouderenzaken operacional, pa no solamente implementa e maneho pero tambe duna e servicio optimal, di calidad, na nos adultonan mayor”, Minister Ursell Arends a enfatiza.
