Rulienne Arends Trahador Preventivo na FADA:
ORANJESTAD (AAN) — Den entrevista cu Rulienne Arends, Trahador Preventivo na Fundacion Anti Droga Aruba (FADA), el a comenta cu el a scucha for di diferente persona tocante e droga “Zombie”, actualmente.
Rulienne a splica cu den pasado caba e nomber aki tabata circula pero ora a bay check kico précis e tabata, ta e kimico MDMA combina cu otro kimiconan.
El a agrega cu ya despues di algun tempo tur cos a keda keto, no a scucha nada mas di dje, te aworaki cu e nomber Zombie a bolbe bin dilanti. FADA a bay busca informacion kico précis e ta, y a wak cu tin casonan na diferente parti di Merca, unda adictonan ambulante a ripara cu nan ta hayando herida na nan curpa, y ora cu a bay haci onderzoek a puntra nan ki otro droga nan ta uzando, y nan a bisa cu ta gewoon fentanol (Fentanilo), cu ta un droga basta conoci y cu ta causando un problema grandi na Merca, unda cu den forma di angua nan ta uza esaki.
Rulienne a menciona cu nan a bay test e fentanol aki y a resulta cu no ta e angua aki sino un combinacion di fentanol cu otro kimico cu ta un trankilizante pa bestia. Ta Veterinarionan normalmente ta uza esaki, y otro kimico ta esun cu ta causa e heridanan, cu hasta tabata tin caso cu mester a amputa man of pia den e caso aki.
Rulienne a reitera cu ta e fentanol hunto cu otro kimico, teniendo na cuenta cu esaki no tur ora ta wordo bendi puro riba caya.
El a señala cu, particularmente, na Merca e casonan ta subiendo pa siman y no ta papiando di varios cien pero di miyones di adicto ambulante, y cualkier hende cu ya tin un adiccion caba na fentanol cu por haye den forma di pildora y puiro tambe. “Esnan cu ta wak television, cu ta mira programanan di Merca, por wak cu ultimamente no ta haya traficacion solamente di marihuana y extasis, pero a aumenta pa loke ta fentanol ta esnan cu ta wordo pasa mas den e boardnan di Mexico cu Merca den e caso aki. Pues, e ta un problematica cu tey pa hopi aña caba, pero aworaki nan ta uza e nomber di Zombie.
