Aruba ta sigui habri porta pa exterior y bay eleccion sin proteccion tapa boca - *Despues di sacrificionan grandi bienestar di Aruba den man di publico - *Personanan no vacuna mester tene consideracion cu e riesgo cu nan ta
ORANJESTAD(AAN)—Ayera Gobierno a anuncia cu ta suavisa medidanan cu a tuma den cuadro di Covid-19. Cu e decisionnan di Gobierno durante ultimo dianan, Aruba ta habri caminda pa un futuro nobo pero tambe pa un situacion den cual e responsabilidad di ciudadanonan ta mas grandi cu nunca.
Uno di e decisionnan mas importante cu Gobierno a tuma, sigur ta e hecho cu mondkapje no ta obligatorio mas pero ta wordo recomenda na tur hende.
Na momento cu e ultimo decisionnan di Gobierno drenta na vigor, DIARIO cu for di prome momento cu Covid-19 a bati na porta di mundo a informa Aruba, sigur mester presenta awe na tur ciudadano e responsabilidad enorme cu awor mas cu nunca tur ciudadano tin enfrente nan mes y enfrente tur otro ciudadano.
Aruba ta bay deshaci di “tapa boca” cu ta un proteccion directo contra transmision di e virus. Pero na mes momento, e tapa boca a bira un luz cora na tur hende y un alerta pa sea cuidadoso cu e enfermedad serio.
Aruba a logra atrobe deshaci di un ola sumamente tragico di Covid-19 y Gobierno a guia pueblo debidamente riba e caminda pa confronta e menasa grandi cu Covid-19 ta pa cada persona, pa comunidad den su totalidad pero pa tur asunto cu ta regarda e ser humano.
Ta pa motibo di Covid-19 Aruba mester a deshaci di su economia pa medio di turismo na 2020 y mester a hiba sacrificio enorme .
Den e situacion cu por a causa miles di morto na Aruba, Gobierno Wever-Croes a tuma medidanan cu a topa cu hopi critica, pero cu mester a wordo tuma ora Aruba a drenta e estado di guera contra e enfermedad mortal.
Pa DIARIO e realidad di Covid-19 ta haci cu no ta sin mas awe nos por bisa pueblo cu bida normal ta sigui. E bida normal cu mundo henter a conoce prome cu Covid-19 a presenta, no ta existi mas.
Na e momentonan aki mas cu 173 Miyon caso di Covid-19 a wordo registra rond mundo cu ta na caminda pa registra 4 Miyon morto.
E solucion mas grandi cu mundo y asina Aruba tambe tabata tin contra Covid-19 ultimo lunanan, tabata e vacuna, cu a bira un barera den mayoria di caso contra Covid-19, cu ainda ta un peliger.
Awe DIARIO ta considera necesario pa mustra tur Arubiano riba e responsabilidad grandi cu ta den man di tur hende, enfrente otro.
Aruba ta den tempo di eleccion, cu semper ta trece actividad publico pa simpatisadonan di partidonan.
Den e situacion aki, sinembargo, no mester perde for di bista cu cada contacto humano por ta un ayudo pa Covid-19 bolbe plama y bolbe hiba Aruba na un catastrofe, cu medidanan a preveni.
Awor hende ta haya su libertad pa cana sin tapa boca. Na hopi pais democratico cu a deshaci di mondkapje, a sigui mira publico cu tapa boca pa deshaci di riesgo.
Mester tene na bista cu Aruba ta un pais turistico y un isla cu ta mira con su portanan ta sigui habri pa bishitantenan cu nos mester pa nos economia, pero tambe pa e Arubiano biaha pa exterior.
Aruba conoce e realidad di Covid-19, e enemigo invisibel cu ta penetra den cas di famia.
DIARIO awe ta pidi tur Arubiano pa sigui uza tapa boca. Pa sigui practica prudencia grandi contra Covid-19 cu ta causando desastre rond mundo ainda.
Aruba ainda tin hopi hende cu mester ricibi nan vacuna. Un cantidad sumamente chikito di persona cu ricibi nan vacuna, por wordo infecta.
Ciencia medico ainda ta investiga cuanto tempo e vacuna ta duna proteccion y despues cuanto tempo mester bolbe vacuna.
Na un pais democratico tur hende ta liber pa haci loke nan kier, mientras nan no ta menasa otro. Covid-19 a keda un caso excepcional.
Si despues di 9 di Juni Polis por duna un persona boet pa pasa den luz cora, hende por deshaci di tapa boca cu ta su proteccion y di otro hende sin problema publico.
Aruba ta sigui tuma pasonan pa un normal nobo pero tambe pa un responsabilidad enorme. Pasobra un accion inrresponsabel di uno, por ta morto di e otro sigur na un isla turistico, mientras hende no a canta victoria riba Covid-19 y ainda hopi hende ta nenga e vacuna.
