Coronacion di Shannon Vullings y Gen Ras pa Miss Turismo di Aruba

ORANJSTAD (AAN): Diasabra anochi dilanti grupo di invitado na Cage Nightclub a tuma lugar coronacion oficial di dos candidata cu lo representa Aruba pa e titulo di Miss Turismo Mundial.

   E prome cu a wordo corona tabata Shannon Vullings como Miss Petite Turismo Aruba 2026.   El a wordo instala door di Brianna Arrindell, kende aña pasa a participa na e certamen internacional y a keda corona como Teen Tourism World 2026.  Despues di a pone e sjerp, el a pone e corona riba cabez di Shannon.

   Despues di esey, a sigui turno di e docente Gen Ras como Señora Turismo Aruba 2026.  El a wordo instala door di Zahaira Marin, kende aña pasa a logra e titulo di 1er finalista di Señora Turismo Mundial 2025.  Posteriormente el a pone corona riba cabez di Gen.

   Nan dos ta bayendo den luna di Augustus na Punta Cana na Republica Dominicana, unda nan lo representa e isla aki na e certamen di Miss Turismo Mundial 2026.  Nan tin como un luna pa prepara pa e evento grandi aki cu lo bay ta for di 10 pa 15 di Augustus 2026 na Republica Dominicana.

   Miss Petite Turismo, esta Shannon a splica cu e ta cla pa duna su mihor prestacion na e certamen.  Ora cu e presentador George Winterdaal a puntra Señora Turismo Aruba docente Gen Ras si acaso su alumnonan sa cu e ta bay participa den certamen, el a splica cu solamente un par di colega na scol tabata sa, y un amiga cercano di dje.  Pues ta tur alumno lo haya sorpresa pa mira nan juffrouw Gen riba escenario.

   Pa ambos candidata, DIARIO a mira e conocido Angelo Trimon patras di escenario ta coordinando e preparacion di nan.  Di awor caba palabranan di exito na e dos representantenan nobo di Aruba.