Bunita y emocional graduacion di Colegio EPI Sector Economia

ORANJESTAD (AAN): Un cantidad di alumno, mayor, docente, y tambe Ministro di Enseñanza Gerlien Croes tabata presente

den Ballroom di Marriott’s Aruba Resort & Stellaris Casino pa asina disfruta di e momento unico di nan graduacion.

   Esaki tabata pa e alumnonan cu a logra di gradua pa nan diploma di Colegio EPI Sector Economia.  Y e tabata un anochi cu hopi animo mes, unda por a mira e satisfaccion den wowo di hopi studiante, mustrando cu nan a logra obtene loke nan a traha duro pe.  Por a mira e alegria cerca mayornan cu a keda hopi emocional pa mira nan yiunan obtene algo importante den nan man.

   Tambe tabata pa DIARIO un placer pa nota con e talentoso hoben Byron Lesire, kende ta conoci como un persona kende a nace bao di spectrum di Autismo, toch a demostra cu esey no ta strob’e di bay dilanti, y cu apoyo di hopi hende, incluyendo su mama incansabel, a sa di obtene su diploma di Colegio EPI.

   Ministro Gerlien Croes a manda duna pabien na tur graduado, y ta sigui apoya nan cu e mensahe pa nan sigui traha duro pa logra nan meta pa un futuro prometedor.  E potretnan aki pa cortesia di Ministerio di Enseñanza.