Coriente a bay varios caminda pa oranan largo debi na accident di auto

Elmar kier promove siguridad di trafico pa bienestar di nos y di otro

ORANJESTAD (AAN): E weekend aki no tabata uno agradable pa varios ciudadano riba e isla.  Imaginabo ta keda pa hopi ora largo sin coriente, debi na auto cu ta pasa ranca palo di luz.

   Segun NV Elmar, durante e fin di siman cu a pasa, a sosode 3 diferente accident di auto riba Aruba, e.o. na Paradera, Avenida Nelson Oduber y Santa Cruz envolviendo palonan di luz di caya of coriente, causando un peliger pa e conductor y nan alrededor. E situacion aki no ta solamente causa daño na e grid di coriente di Aruba, pero tambe ta laga un area sin suministro di coriente temporalmente, cu ta causa incomodidad na ciudadanonan.

   Ademas, e cantidad di casonan di chauffeurnan cu ta “Hit & Run” e palonan di luz di caya of coriente ta birando mas y mas preocupante, specialmente den casonan unda NV Elmar no ta worde informa riba e daño causa na e palo. Consecuencia di esaki ta cu e ta laga e area alrededor di e palo y e grid di coriente den un situacion vulnerabel.

   E compania kier pone enfasis riba e importancia di siguridad den trafico, pasobra gran parti di e grid di coriente di Aruba ta riba tera. E motibo di esaki ta cu kabelnan bou tera lo aumenta e duracion pa realisa trabaonan di reparacion. Ademas cu e tera di Aruba ta seco y duro cu ta trece costonan halto pa coloca henter e grid di coriente bao tera. Den tur dos caso, e infrastructura di trafico di Aruba lo inclui palonan di luz di caya.

   Pa e motibo ey, nan kier haci un suplica na tur chauffeur pa maneha cu cuidao y consciente, sigui reglanan di trafico, pa asina evita accident di auto. Tur hende riba caminda ta forma parti di nos comunidad y nos tin cu traha hunto pa mantene un ambiente di trafico sigur pa un y tur.

   Accident na Paradera: DIARIO a compronde cu e accident di mas grave tabata Diasabra na Paradera, cerca di e rotonde pa bay Jaburibari.  Aki un Suzuki Swift color blauw a dal den 1 palo di luz, pero e impacto aki a pone cu el a ranca 3 palo en total benta abao, incluyendo transformer importante di NV Elmar.  Tur e desastre cu e chauffeur burachi sin rijbewijs aki a ocasiona, a bira un pesadiya logistica pa e compania.  For di alrededor di 8’or di mainta cu e accident a socede, finalmente te banda di 8’or di anochi tur hende eybanda a haya coriente bek!  Nan a keda como 12 ora sin coriente, debi na un persona cu no mester di tabata tras di stuur.  E gastonan astronomico aki di NV Elmar lo bay cay riba su schouder sigur pa bay paga, pasobra kizas su aseguro lo no cubri esaki.

   For di Elmar, a haya informe cu nan ta gradici nan tecniconan cu a traha incansabel durante e fin di siman cu a pasa pa reestablece suministro di coriente despues di accident di auto riba palonan di coriente.