Core riba caminda cu plachi di number cu no ta valido ta castigabel

Drs. Luenne Gomes Pieters, Directora di DIMP

*Esaki ta conta tambe pa esnan cu ta print y traha plachi di number falso 

ORANJESTAD (AAN): Directora di Departamento di Impuesto Aruba (DIMP), Drs. Luenne Gomes Pieters a elabora riba e ley pa loke ta trata falsificacion di number di auto. Señora Pieters a indica cu DIMP desde comienso di e luna aki, a cuminsa conscientisa automobilistanan contribuyente na impuesto di vehiculonan di motor cu e uzo di plachi di number falso ta castibel segun e Landsverordening Wegverkeer articulo 17 na unda ta indica cu ta prohibi pa laga of core un vehiculo di motor riba caretera, si e vehiculo no tin plachi di number valido. Plachi di number falso no ta permiti pa core riba nos careteranan por lo tanto ta castigabel. 

Actualmente tin un acuerdo ministerial cu ta determina cu pa 2025 te cu 2029, lo uza e plachi di number blauw cu inscripcion blanco. Te cu awo DIMP a cuminsa otorga e plachinan di numbernan aki desde december ultimo via un sistema di cita. Varios automobilista te awo no a pasa busca nan plachi di number. 

Señora Pieters a remarca cu Polis tin e autoridad pa controla plachinan di number cu ta falso. Bou di esaki ta cay tur plachi cu no ta esun blauw cu inscripcion blanco cu ta wordo otorga pa DIMP. Plachinan di number cu ta traha di sticker, papel, carton of kualkier otro material, plachinan imita. Tambe tur plachi di number di añanan anterior ta cay bou di plachi number falso. 

“Nos ta pidi nos contribuyentenan pa si nan mira algo riba caya, por notifica esaki via e formulario digital di fraude di DIMP cu por obtene riba nos website. Duna mas detaye cu ta posibel, entre otro; fecha y lugar unda a wak e auto, e marca y color di e auto. Mas detaye haya, miho nos por haci nos trabou di investigacion. Por haci esaki na un forma anonimo”, señora Pieters a duna di conoce. 

E Departamento di Inteligencia Fiscal (FIOT) conhuntamente cu KPA ta encarga pa haci investigacionnan di casonan di plach’i number falso cu ta wordo considera como fraude fiscal. Y esnan cu ta comete e actonan aki, lo ser persigui. Esaki ta conta no solamente pa e automobilistanan cu ta core cu e plachi numbernan falso, sino tambe pa esnan cu ta print (inprentanan) y esnan cu ta traha e plachi di numbernan falso. Esakinan ta duna e automobilista e oportunidad pa kira ley. 

“Ta importante pa tin un comportacion corecto y husto ora ta trata impuesto. No ta corecto pa esnan cu no a paga impuesto di vehiculo di motor, trafica cu plachi di number falso riba nos careteranan y ta haci como sifuera e impuesto ta paga. Di otro banda, no ta husto pa esnan cu si ta cumpli cu nan pago, pa mira e mal comportacion aki di otro riba nos careteranan”, e Directora di DIMP a enfatisa.