Parlamentario Rocco Tjon:
- Bestuurlijk akkoord no ta mara Aruba na un Rijkswet
ORANJESTAD (AAN): Parlamentario Rocco Tjon a habri siman cu un reaccion hopi fuerte mes, riba loke un Ministro y tambe Gobierno a bin ta trece dilanti encuanto e rijkswet nobo. Ta varios miembro di oposicion a cuestiona con tur esaki a wordo haci sin cu a envolvi Parlamento den e asunto.
Segun Tjon, e declaracion di Gerlien Croes y Gobierno riba rijkswet HOFA no ta cuadra cu realidad. No a y no ta existi ningun “acuerdo final” cu Hulanda pa implementa un rijkswet door di Gobierno di Evelyn Wever-Croes.
Na opinion di Parlamentario Rocco Tjon, tur loke a worde firma den Juni 2024 ta un bestuurlijk akkoord, un acuerdo politico cu no tin ningun obligacion pa yega na un rijkswet. Ta solamente e intencion pa negocia.
“Gerlien Croes su postura arogante, accionnan manipulativo y falta di bisa cu ta e kier e rijkswet ta pone pueblo pensa. Si e rijkswet ta bon pa Aruba, di con Gerlien Croes no ta bisa cu e a logra esaki?” ta loke Parlamentario Tjon a cuestiona.
Tjon ta hasta puntrando su mes, kizas awor a caso nan lo bay bisa tambe cu ta Evelyn Wever-Croes a keda sin informa Parlamento y entrega esaki na Hulanda riba 13 di augustus 2025?
“E bestuurlijk akkoord ta papia palabra cla, e ta brinda e cuadro pa discuti y negocia cu Hulanda. E no ta mara Aruba na nada. Y sigur e no ta duna Gerlien Croes e autoridad pa entrega un concepto di ley na Hulanda sin informa Parlamento.”
Tjon a finaliza bisando: “Nos tur merece transparencia y no propaganda politico di Gerlien Croes. Nos firma ta nos bos y nos accion concreto contra e rijkswet. Aruba merece politiconan serio cu ta asumi nan responsabilidad y no politiconan cu tenchi largo.”
