Matamento di bestia na cas ta ilegal
ORANJESTAD (AAN): Veterinaire Dienst ta recorda tur persona cu kier sacrifica un cabrito, carne of porco pa consumo mester haci esaki na Abattoir. Matamento di bestia na cas ta ilegal y por tin su riesgo pa salud di hende. Tur hende cu kier haci uso di servicio di Abattoir pa sacrifica un bestia durante luna di November y December 2023 por haci esaki for di Dialuna te cu Diahuebs, parti mainta cuminsando dialuna 13 di november te cu dialuna 18 di december 2023.
Alabes ta anuncia cu e proceso di sacrifica animal na Abattoir ta tumando luga a base di afspraak. Es cu ta desea di sacrifica un of mas animal pa come mester percura pa jama di antemano pa confirma cu e kier haci uso di e servicio di Abattoir. Esaki ta pa purba coordina e matansa na un manera mas structura, cumpliendo cu reglanan di hygiena y prevencion di transmision di Influenza y COVID.
Ta pidi encarecidamente pa trece animalnan entre e ora duna pa e afspraak. Si no bin na ora duna pa e afspraak mester haci un cita di nobo. Pone bon atencion, sin afspraak bo lo no wordo atendi.
Ultimo dia pa mata bestia ta Dialuna 18 di December 2023 cu un capacidad limita; pues no warda te ultimo orapero traha bo afspraak di antemano.
Ban coopera hunto pa asina e proceso na Abattoir por cana na un manera planifica y tranquilo pa asina nos tur por pasa un bon fin di aña.
