Casa Nonna Restaurant na The Ritz Carlton Aruba un biaha mas ta host 'Five Senses'

Un exkisito menu prepara pa Chef Vargas...

*Un 5-course wine dinner unico! 

ORANJESTAD (AAN):  Diabierna awor na Casa Nonna na The Ritz Carlton Aruba hunto cu Bomma Wines ta bay tin un evento unico y esaki ta un di e poconan na Aruba di e nivel aki caminda por disfruta di un tremendo 'five-course wine dinner'.

            Esaki sigur lo ta un experiencia culinario inolvidabel cu e toke magico di Chef Jhon Jairo Vargas y 'sommelier' Pauline Stoker, kendenan a selecta 5 plato y a 'pair' esaki cu 5 biña cu lo pone tur hende bay den un experiencia unico.

            Yahira Santoni, Directora di Comunicacion na The Ritz Carlton Hotel Aruba a duna di conoce durante un evento special pa prensa diamars atardi cu diabierna awor, 3 di November, ta bay tin un biaha mas 'Five Senses' cu ta nan 'wine pairing dining experiences' cu nan ta ofrece na The Ritz Carlton Aruba.

            E biaha aki Casa Nonna ta host e evento aki y Chef Jhon Jairo Vargas a hinca den otro un bunita y exkisito menu complementando cada plato cu un biña diferente pa asina por hiba bo den un experiencia culinario extraordinario. Mester remarca cu The Ritz Carlton Hotel ta organisa e eventonan aki dos of tres biaha pa aña y ta algo cu ta sigur bale di pena y cu tur amante di e bon cuminda mester atende.

            "Nos kier pa tur bo sentido wordo deleita durante di e dinner aki, cu e biña, cu e plato, cu tur e sabornan, e aromanan pa asina esaki por ta un experiencia unico cu nos ta brinda akinan na The Ritz Carlton Aruba", Santoni a expresa.

            Ta bay tin un sommelier cu lo bay splica cada biña cu ta wordo presenta cu cada plato, cual tin e meta di crea un balans di sabor entre e biñanan y e diferente cumindanan.

            'Five Senses' ta bay ta diabierna awor 3 di November di 6:30 pm te cu 10 pm. No lubida di haci bo reservacion na tempo pa asina sigura bo oportunidad di disfruta y saborea di e experiencia culinario aki. Check e ad di e evento aki awe den DIARIO. No perd'e!