ORANJESTAD (AAN): Recientemente DIARIO a tuma nota, cu resortnan local ta sigui crea espacio ideal pa bishitantenan para y saca potret como souvenir di nan vakantie.
Dilanti Divi Village a mira recien e borchi iconico di “I Love Divi”. Borchinan iconico asina normalmente ta usa e frase “I Love”... pero e simbolo di curazon ta reemplaza e palabra ‘love’, y esun na Divi aki ta den un color cora bibo.
E trend di e borchi aki a cuminza cu “I Love NY” cu ta esun original y mas famoso, cu e curazon cora envez di e palabra ‘love’. Otro cu a bira hopi famoso tambe ta “I Love Amsterdam”. Tin algun lugar cu tin biaha ta incorpora e bandera of algun landmark di e ciudad of pais bunita mezcla cu e simbolo di curazon.
Ademas di e borchinan aki, bo ta haya mercancia cu e diseñonan rond mundo, y tambe sticker, pa asina bo por keda demostra bo amor pa un lugar of pais.
