Copia di buki “Na mi kas” entrega na Biblioteca

ORANJESTAD (AAN): Biblioteca di Aruba a caba di ricibi e buki ‘Na mi kas’ for di Levendig Uitgever,

cu ta encarga cu e produccion di 2 buki pa mucha. Esakinan ta publicacion pa Festival di Buki pa Mucha y na Curaçao e ‘Siman di Ban Lesa’.

   E buki pa mucha cu biblioteca na Curaçao ta presenta e aña aki yama ‘ Na mi kas’ (Bij mij thuis). Mescos cu na Aruba, esaki ta un buki pa mucha na 2 idioma den categoria di edad di 4 pa 12 aña. Organizacion di e siman ta den man di Biblioteka Nashonal Kòrsou.

   Diferente escritor y contador di cuenta di Curaçao a traha riba e publicacion aki: Mercee Doran, Merly Augusta., Alvin Inecia (Tio Ali), Edelmira Koko, Loekie Morales, Jeroen Hoogerwerf (Levendig Uitgever), Ilse Schoobaar-Anthony y Crisen Schorea. Ilustracion ta di Ghislaine Monte y Karino Ariza.

   Esaki ta un compilacion di storia tocante e topico ‘cerca nos na cas’. Un tema cu ta cerca di cada mucha y ta duna hopi inspiracion. Asina tin hopi expresion di diferente experencia di cultura di cas y famia.

   Jeroen Hoogerwerf, doño di Levendig Uitgever y autor di buki pa mucha ta na Aruba e siman aki pa bishita diferente scol pa lesa buki y conta storia y conta algo di su trabao.