Parlamentario Shailiny Tromp-Lee:
ORANJESTAD (AAN): Segun Parlamentario Shailiny Tromp-Lee, ta un hecho cu ainda Aruba ta den negosacion cu Hulanda. No obstante e hecho cu Aruba tin masha tiki espacio pa negosha, Gobierno di Aruba ta keda sinta na mesa pa saca un miho deal pa nos pais.
Mas y mas nos ta cuminsa scucha zonidonan di sosten for di Parlamentarionan hulandes y por a tuma nota cu cierto presion ta keda poni riba nan gobierno pa loke ta trata refinanciamento di e debe di Covid-19. Nos tur por corda e video di Professor Nicolaï, miembro di Eerste kamer, cu a circula rond algun siman atras. Argumentonan uza den e video aki ta subraya loke como Parlamentario, mi persona a bin ta indicando desde un principio y sigur a uza tur oportunidad pa accentua esakinan na reunionnan di IPKO.
Den su video Profesor Nicolaï a enfatisa cu e trato cu Hulanda a duna Aruba pa e prestamo di COVIS ta uno discriminatorio y humiyante. Peter Nicolaï ta un hurista y pa hopi aña a traha como hoogleraar bestuursrecht. E sa kico e ta papia y no tin miedo pa vocifera y sostene Aruba den su lucha pa un trato husto y mihor condicionnan di refinanciamento.
Siman pasa durante un reunion den Eerste Kamer caminda a trata e tema di refinanciamento di e debe di Covid pa Aruba (como parti di presupuesto supletorio di Koninkrijksrelaties), nos por a scucha Parlamentario Crone (Groenlinks/PvdA) para pa un trato mas husto pa Aruba. Su persona a indica claramente cu Hulanda ta bay gana placa cu e refinanciamento aki: “…..Nederland gaat verdienen op leningen aan Aruba!”. Alavez el a indica cu e no ta haya corecto pa confronta Aruba cu un knevelrente: “....we moeten Aruba toch niet confronteren met een knevelrente”.
Ta bon pa pueblo sa kico e palabra knevelrente kiermen. Knevel ta nifica: een prop, doek of stuk plakband waarmee iemand het spreken belet wordt. Cu otro palabra ‘take it or leave it! This is it!’ Cu un palabra el a splica con enberdad, como un Arubiano, nos mester mira e interes di 6,9%. el a subraya e proceso. Mirando cu nos no kier acepta nan condicionnan (algun sin base), Hulanda ta bisa tuma e interes ridiculamente halto aki y cera bo boca.
Durante e mesun reunion nos por a scucha Parlamentario Hartog (Volt) indica cu e ta haya desapuntante cu den Reino tin paisnan cu mester bay paga interes conforme mercado y adicionalmente un risicoopslag. E ta asta indica cu mester tin otro maneranan pa atende cu e parti di supervision y administracion financiero. E tabata hopi critico puntrando asta kico Hulanda ta bay haci cu e ganashi cu nan ta bay haci cu e refinanciamento aki di Aruba. el a enfatisa cu e ta haya cu Hulanda a dal un stap den e direccion incorecto ora el a pone e condicionnan pa cu e refinanciamento di e debe di Covid-19.
E desaroyonan aki sigur ta indica cu nunca ta laat! Poco poco nos ta ripara cu nos mensahe, grito pa trato husto y igual, nos urgimento pa yudansa a base berdadero di art. 36 di Statuto, nos critica cu Hulanda kier haci negoshi cu e debe di pandemia riba lomba di nos pueblo ta hayando oido y ta pone algun politico cu enberdad tin Aruba na pecho vocifera nan opinion.
Lo ta bon pa nos hendenan biba aya na Hulanda habri orea scucha y tene na cuenta cua ta e politico y partidonan cu enberdad tin nos islanan na pecho. Un djis ta eleccion.
