Coordinatie Centrum Mensenhandel Mensensmokkel Aruba a lanza nan campaña: ‘No Cay den Trampa’

‘Hunto nos ta purba di preveni trafico humano via canalnan digital’

ORANJESTAD (AAN): Diabierna Coordinatie Centrum Mensenhandel Mensensmokkel Aruba a lansa nan campaña nobo y durante un conferencia di prensa, lider di proyecto di e centro Angela Persad a splica cu e campaña yama: ‘No Cay Den Trampa’.

Segun Persad, trafico humano rond mundo ta un problema creciente y compleho.

“Den esaki tecnologia actual riba internet manera social media mas y mas ta hunga un rol mas grandi”.

Traficantenan humano facilmente ta encontra y ta probecha di hobennan vulnerable via e canalnan digital, segun Persad.

El a sigui bisa cu hobennan ta pasa masha hopi tempo mes riba social media y hopi biaha nan no ta realiza unda peliger ta sconde.

Door di esaki nan tin chens grandi pa cay den mannan di un traficante humano.

Segun e lider di proyecto, e mundo aki unda cu malhechornan ta probecha di hobennan na e manera aki, ta algo bastante desconoci pa e hobennan.

“Pesey e meta di e campaña aki ta pa crea un concientizacion cerca hobennan riba e peligernan di nan comportacion online, via cual otronan por probecha di nan”.

Den esaki e mayornan tambe tin un rol hopi importante.

Hunto nos ta purba di preveni trafico humano via canalnan digital, segun Persad.

Minister di Enseñanza Endy Croes tabata presente na e conferencia di prensa, representando minister di Husticia Rocco Tjon, kende no por tabata presente.

Croes a indica cu e campaña aki sigur ta haya atencion di ministerio di Enseñanza tambe.

El a indica cu via internet y specialmente den e tempo di pandemia por a ripara cu a bira mas facil pa asina yama ‘Grooming’ tuma lugar.

Croes a indica cu ta importante pa traha riba prevencion di ‘sexting’ y ‘sextorsion’, unda cu malhechornan ta probecha di hobennan, haciendo uso di por ehempel potretnan sunu di e hobennan.

“Hendenan hopi biaha no ta realiza con peligroso actividadnan online por ta y con ta e mihor maneranan pa proteha nan mes ora cu nan ta haci uso di internet”, segun e mandatario.

Croes a bisa cu pesey ta importante pa na Aruba tur hende ta hopi conciente di e peligernan cu por tin riba internet.