ORANJESTAD (AAN): Wardacosta di Caribe Hulandes lo bay enfoca di awor en adelante riba mas patruyahe di control riba lama.
E controlnan aki ta dirigi pa check si tur Barco, Boto, Velero, Speedboat, Seadoo, Jetski, Waverunner, etc., tin documentonan valido di nabegacion den nan poder, hunto cu equiponan di seguridad.
Ya caba den area di Curaçao a nota cu Wardacosta den ultimo simannan tabata hopi ocupa ta haci control riba lama dilanti e bocanan y beachnan na parti pariba, y parti pabao di e isla. Durante patruyahe di ultimo weekendnan, Wardacosta a duna 12 multa, y por lo menos un Waverunner a wordo confisca.
E patruyahe di control aki ta wordo haci den colaboracion cu Inspeccion di Seguridad di Waf y Polis di Curaçao. Den controlnan cu lo sigui, Wardacosta lo bay check na forma severo riba reglanan, y si ta necesario lo duna multa. Den caso di mas serio, lo confisca e boto of aparato tambe. Pesey Wardacosta ta suplicando tur capitan pa nan percura pa nan tin documentonan di boto y material di seguridad cu salbabida abordo.
Wardacosta ta conseha tur doño di boto, pa nan mantene nan boto den top condicion, wak pa bo tin suficiente material pa seguridad y rescate abordo, manera jacket salbabida, flashlight, kit di EHBO, suficiente awa, aparato pa paga candela, VHF Marine Radio, of un smartphone cu bon bateria. Pasobra semper bo por yama Wardacosta via number 913.
