ORANJESTAD (AAN) – Muriel Meyer, Coordinador di Proyecto Kibrahacha pa Corsou, den entrevista cu DIARIO a expresa cu for di principio nan a tene cuenta cu e diversidad den cada un di e diferente islanan,
y cu e sistema di enseñanza cu cada Isla ta ocupa su mes cun’e pa e alumnonan, y loke nan a haci ta adapta te caminda por cerca cada scol, pero tin aspectonan cu nan a haci comun, pasobra Kibrahacha mester keda den su forma unico, manera a pon’e na principio pa e tres Islanan.
Meyer a señala cu Sint Maarten cu awo ta cana banda di e otro islanan, por forma e totalidad di Kibrahacha. El a agrega, como Coordinador di practica y stage pa Corsou, pa loke ta nan Instituto, un aspecto cu a bin den dje ta pa traha hunto (Samen opleiden). “Bo tin e instituto pero bo tin scolnan tambe cu bo ta traha hunto, anto e medio cu bo ta uza ta studiantenan cu den forma di un neishi ta bay e diferente scolnan y conhuntamente nos ta purba traha riba e curriculum, cu ta bay uza na e scol; un plan di estudio, nos tin cu bisa pa nos por uza conhuntamente na e diferente scolnan”, Meyer a señala.
El a manifesta cu pa Corsou e no ta nifica un cambio asina grandi, pasobra nan muchanan tabata bay den grupo caba, na e diferente scolnan, pero awo nan ta papia di colega den estudio; kiermen, nos no ta stagiaire of pasantia, manera aki na Aruba nan ta bisa. “Pero nan ta bay scol, ta forma parti di un team completo, y henter scol, defacto, mester bira e scol cu hunto cu e Instituto ta yuda forma e coleganan den estudio na e diferente scolnan cu nos tin.
Na e momento aki nos tin diez scol na Corsou, dividi, y nos ta masha orguyoso di bisa cu ya nos tin cuater aña drentando den e scolnan, pa loke ta Kibrahacha, y awe nos ta considera como un dia historico, nos ta marca pauta den Kibrahacha, caminda tur Isla, tur e actornan di Kibrahacha ta hunto aki na Aruba”, señora Meyer, Coordinador na Corsou, a expresa.
El a subraya cu esaki ta masha positivo tanto pa e alumno cu ta bay den klas, pa e maestro cu ta para den klas, e guia di scol pasobra nan tin guia interno na scolnan, pero tambe pa e cabesante di scol contal cu cada un sa kico ta nan rol. “Pero e rol no ta keda los. Cada rol di cada actor di e proyecto ta forma e totalidad di Kibrahacha den e diferente scolnan”, Muriel Meyer a acentua.
