ORANJESTAD (AAN) — En conexion cu Dia Internacional di Derechonan di Mucha, Dia 20 di November, lo bay tuma lugar un Conferencia bao nomber:
“Happy Parents, Happy Children”, dia 14 y 15 di November proximo den Cas di Cultura, di 6’or di atardi pa 9’or di anoshi.
Den conferencia di prensa, Zilha Bruin Wever, di Piso 3, a haci un introduccion tocante e evento aki. El a cuminza pa splica cu Piso 3 ta un centro den Caya Grandi, unda ta realiza diferente evento, y despues di un seminario exitoso cu a tuma lugar na 2022, Zilha hunto cu su team dinamico a dicidi pa bin cu un conferencia cu e meta di trece e comunidad di Aruba hunto, presenta diferente strategia innovativo, herment y practicanan hopi valioso pa mucha y hoben.
Seguidamente, Kindra de Cuba Sprok, a amplia e informacion aki. El a splica cu e obhetivo di e seminario aki ta pa provee mayor, educador y entrenadornan y tur persona cu tin di haber cu desaroyo y cuido di nos mucha y hobennan, cu tools y hermentnan basa riba estudionan haci door di expertonan, oradornan local y internacional, unda nan lo referi na temanan manera comunicacion, e aspecto social di nos muchanan y tur locual mucha y hoben ta experiencia y asina por lanta un generacion firme y stabil pa e comunidad di Aruba.
E conferencia lo ta parti den dos dia. Esaki pasobra dia 14 di November e tema lo ta basa riba e muchanan, y nan ta spera e audiencia specificamente cu ta atende cu muchanan entre 0 pa 10 aña. Esta, mayor, educador, y entrenadornan. Dia 15 di November, e tema ta specificamente pa hobennan, y e audiencia cu ta spera e dia aki pa personanan cu ta atende cu hobennan entre 11 cu 18 aña.
Pa host e conferencia ta bin for di Hulanda, señora Laura Tromp, ken alavez lo fungi como moderador y MC. E dama aki ta un parent coach, cu ta residencia na Hulanda y eynan e ta eherce su funcion y e lo ta na Aruba e dos dianan pa host e conferencia.
Ademas lo tin oradornan local y internacional pa ambos dia di conferencia. Ticketnan ya ta disponibel y lo ta na un prijs accesible pa tur persona y lo tin un prijs special pa educadornan.
