Convenio riba Arkeologia Subacuatico por fin lo wordo ratifica pa henter Reino Hulandes

Arkeologo Raymundo Dijkhoff:

ORANJESTAD (AAN) — Raymundo Dijkhoff, Hefe di Coleccion y Investigacion di Museo Arkeologico, a duna un charla tocante e Desaroyo di Arkeologia Subacuatico na Aruba, unda a culmina den e parti pa ratificacion di e convenio existente, pa henter e Reino Hulandes.

Den un entrevista cu DIARIO, Dijkhoff a expresa cu esaki no ta un logro di su persona pero di henter Museo Arkeologico, pero si ta asina cu como esun cu a cuminza traha na aña 1999, como prome Arkeologo di Aruba, e sa cu Arkeologia no ta solamente e parti Indian pero e parti di historia y e parti di Arkeologia Subacuatico.

El a traha seis diferente tema, cuminzando pa e introduccion pa duna un tiki contexto di e identidad cu mester maneha, e parti di Arkeologia Maritimo Subacuatico. Na di dos lugar, el a enfoca riba e decadanan di añanan 40 te 1999 cu el a cuminza traha kico tabata e situacion eynan. Despues a sigui cu e di tres tema cu ta di 1999 pa 2008 (diez aña), e prome contacto cientifico cu e parti subacuatico cu Aruba tabata tin e momento ey. Despues, a referi na decada 2009-2018, unda tin mas informacion di e tratado internacional pa preservacion di e parti subacuatico; y di 2019 pa aworaki kico ta e stapnan concreto cu Museo Arkeologico ta tumando,  yegando e fin di aña aki pa comienzo di otro aña, cu por fin den henter Reino Hulandes, e tratado aki ta bay wordo ratifica.

“Den cuadro di esey, nos ta bay concientiza e pueblo y loke mi ta dunando aworaki aki ta parti di un plan cu nos ta trahando tras di cortina den full reino, pa tres aña caba, pa concientiza e pueblo; pasobra e ta bay wordo ratifica y esey ta bay tin consecuencianan pa maneho na Aruba, pa tur e stakeholders, y tur desaroyo cu ta pasa den lama, cu mester tene cuenta cu locual tin den Arkeologia Subacuatico. Y na final, mi ta duna conclusion”, Raymundo Dijkhoff a señala.

Dijkhoff a splica cu esaki ta un disciplina di Arkeologia, y e ta un experto pero no un specialista. No obstante, el a dedica hopi aña na esaki, y aña pasa el a realiza un estudio intensivo di tres luna cu UNESCO, cu ta casi na un nivel di Bachelor Degree, riba Arkeologia Subacuatico, y na unda cu di 90 studiante, el a sali e miho. El a bisa si cu na Aruba, pa sigui duna stapnan cu e conocemento cu mester, mester traha hunto cu e “community archeology y public archeology” pasobra e no ta un responsabilidad di solamente di e Cuerpo di Manager, pero aworaki tambe e comunidad ta responsable, segun e desaroyo di Arkeologia Internacional.

El a subraya cu dificil esaki no ta, y cu esnan cu tin e conocemento mester sa unda nan tin cu bay pero hacie hunto, pasobra si no, e ta bay bira mas dificil, pasobra e ta depende di henter e comunidad.