Alumnonan di Colegio Nigel Matthew a pasa dilanti White House na Washington

ORANJESTAD (AAN): Manera cu DIARIO a trece dilanti caba, siman pasa un delegacion di 80 alumno di Colegio Nigel Matthew a bula pa Merca.

Hunto cu e alumnonan a biaha 13 docente. Hefe di delegacion ta sr. Ricky Arends y representacion oficial di Colegio Nigel Matthew ta sr. Whitney Kock. Pa ta exacto nan a biaha pa New York y despues sigui pa Maryland.

   Meta di e biahe di estudio ta pa e alumno cera conoci di cerca y experencia un dia na tres diferente universidad.

   Nan a bishita University of Maryland Baltimore County, unda a haya bista di e campus y demas facilidad di estudio.  Fuera di esey, nan a haya chens di bishita tambe Washington D.C. y a pasa tambe riba Pennsylvania Avenue, dilanti famoso White House.

   Awe Diahuebs 13 di maart e delegacion lo yega Aruba di regreso despues di un biahe hopi intensivo y educativo.