ORANJESTAD (AAN): Un team bon motiva y entusiasma bou coordinacion di bibliotecaria Yosmar Maduro-Sneek ta bishita diferente cas di nos Grandinan riba nos isla e luna aki y na mei y juni 2024.
Biblioteca ta presenta 3 persona bon conoci pa conta storia.
Nan ta señora Betty Goeloe (ex-bibliotecaria), Gerry Franca (autor) y sr. Clifford Rosa (coordinador Fundacion Rancho Aruba). Presentacion musical ta den man di Sonrisa Tropical, Hélène Arends y Grupo Zjilea.
Gerry Franca ta autor di bukinan pa mucha, ‘Carlito ta bay keiro’, ‘E storia di Carlito y e tapadera’, ‘Penchi : e conenchi cu su skeiro di djente’. Sr. Gerry Franca y Clifford Rosa lo comparti historia di 200 aña Oranjestad cu lo worde celebra na augustus 2024.
Señora Betty Goeloe a traha na Biblioteca Nacional Aruba pa hopi aña, e.o. den Dept Catalogus y Arubiana. Den cuadro di ‘75 aña Trabao di biblioteca na Aruba’, señora Betty Goeloe a worde invita pa conta historia di biblioteca na Aruba.
Tur aña biblioteca ta organiza su proyecto ‘Conta cuenta na Cas di nos Grandinan. Pa 3 luna ta bishita na total 12 biaha un cas hunto cu 3 escritor local pa deleita e publico presente cu storia bunita y unico.
Despues di e prome parti cu ta e presentacion di e autor, biblioteca a sigui cu Grupo Sonrisa Tropical, cu lo deleita nos Grandinan cu musica di Aruba. Hunto cu team Media ta presenta un bunita mainta pa nos Grandinan.
Esaki ta e di 15 aña cu ta presenta e programa na nos grandinan cu ta biba den e diferente Cas pa nos Grandinan manera e.o. Paviljoen San Pedro, Huize Maris Stella Savaneta, SABA San Nicolas y Cas Marie Savaneta.
Ta percura pa documenta e presentacionnan aki pa medio di filmacion y potret. Service club ‘International club of Quota Aruba’ ta duna sosten financiero pa e proyecto.
DIARIO a compronde cu riba un Diamars mainta 25 di juni ta e ultimo presentacion pa 2024 y ta celebra e clausura cu tur 3 participante.
