Minister Glenbert Croes a duna di conoce:
*Lo crea un industria cu no ta depende unicamente di turismo
ORANJESTAD (AAN): Glenbert Croes, Minister di Labor, Energia y Integracion, a duna di conoce recientemente durante un entrevista cu DIARIO cu ademas di e proyectonan di transformacion energetico di e 'Hydrogen Valley' cu ta basicamente un refineria cu ta produci hidrogeno ta bay bin cu otro facilidadnan pa produci productonan deriva di hidrogeno manera hidrokimico pa exportacion.
Loke ta wak awe na San Nicolas, cu e modelo di energia nobo cu ta bin ta bay ta totalmente diferente, Minister Croes a remarca.
Tin Eagle LNG cu su planta di facilidad di gas caminda cu WEB ta bay uza gas natural enbes di 'heavy fuel oil'. Mientrastanto, ta cumprando 'heavy fuel oil' di Venezuela pa despues cuminsa uza esun di WEB pa baha prijs di awa y coriente. Pero parti ta pa Fuels Marketing & Supplies Aruba inverti e descuento ey den su propio infrastructura, cu ta critico pa importa gasoline, diesel, jet fuel, heavy fuel oil pa cu e economia di Aruba y pa yuda cu prijs di awa y coriente, e mandatario a indica.
E mandatario a sigui bisa cu tambe ta bay bin e ampliacion di e parke solar, di e parke di molina di biento. Pero loke ta bay cambia bida di tur hende na Aruba ta bay ta e descubrimentonan di e yacimentonan di gas cu potencialnan masivo, estilo di loke La Perla tabata na Cardon, tempo cu el a wordo descubri. "Esey ta un rikesa pa e pueblo aki cu ta bay cambia bida di tur hende", a expresa.
Croes a agrega cu e compania aki mes a descubri e yacimento di gas mas grandi na Alaska. Na Alaska nan a baha belasting, awa y coriente. Te hasta tur ciudadano na fin di aña ta cobra un bono, un regalia.
E rikesa di e subsuelo di Aruba pertenece na e cartera di e pueblo arubano y ta algo cu ta bay yuda enormemente. E ta un energia limpi y esey ta bay cambia e bida di un par di generacion, a reitera.
E transformacion energetico ta bay ta un cambio sumamente positivo y lo genera hopi prosperidad y entrada pa tur ciudadano na Aruba.
Aruba lo por bira un ehempel pa sigui den region. Cu e 'hydrogen valley', gas natural, produccion y extraccion di propio cas, e transformacion energetico di e refineria den un refineria moderno a base di gas natural, produciendo productonan limpi, lo crea un industria cu no ta depende unicamente di turismo, e minister a señala.
Entre mas pilarnan economico mas resistente y resiliente Aruba lo keda pa cualkier desafio cu por presenta den futuro, a agrega.
Aworaki Aruba ta den e fase di escogencia. Pa scoge e gruponan. A tarda hopi pasobra no kier reactiva e parke di energia cu ken cu ta. Mester ta selectivo pa scoge nombernan cu tin credibilidad den e industria y cu tin e capacidad operativo, financiero y cu trayectoria. E resultado lo mester ta uno duradero, Minister Glenbert Croes a duna di conoce.
