Banco Central di Aruba --- ORANJESTAD (AAN): Despues di un mehoracion aunke ainda negativo, consumidornan a bira mas pesimista y e confiansa di consumidor a baha te na 94,9, un caida di 1,8 punto di indice durante e di tercer trimester di 2021 (Grafiek 1)[1].
A pesar di un crecemento den e cantidad di turista cu ta bishita nos isla y e recuperacion economico, na final di e di tercer trimester, e preocupacion mas grandi di consumidornan tabata e nivel di prijs, mirando cu 95 porciento di encuestadonan tabata anticipa cu prijsnan lo subi durante e siguiente 6 luna (Q2-2021: 86 porciento), mientras cu 66 porciento a indica cu nan ta preocupa cu nan estado di salud (Q2-2021: 43 porciento) posiblemente door di e COVID-19 variante Delta. Notabel ta cu solamente 26 porciento di respondentenan ta pensa cu e situacion economico lo mehora, esta, 23 punto di porcentahe menos compara cu e trimester anterior (Q2-2021: 49 porciento). Sinembargo, solamente 15 porciento di encuestadonan a raporta cu e posicion financiero di gobierno lo mehora, 11 punto di porcentahe menos compara cu e trimester anterior (Q2-2021: 26 porciento).
Den e di tercer trimester di 2021, tanto e indice di e situacion actual como tambe e indice di expectativa a baha cu respectivamente 1,7 punto di indice te na 95,0 y di 4,2 punto di indice te na 97,1, reflehando expectativanan mas pesimista di consumidornan. Mas cu mita di e encuestadonan tabata anticipa cu recuperacion economico di Aruba for di e crisis di COVID-19 lo dura 2 aña mas (Q2-2021: 50 porciento). Den e tercer trimester di 2021, 67 porciento a raporta cu compra di un auto no tabata apropia (Q2-2021: 67 porciento), 65 porciento a indica cu tuma un prestamo no tabata adecua (Q2-2021: 62 porciento), mientras 61 porciento a indica cu tuma un hipoteca no tabata adecua (Q2-2021: 57 porciento). Como 56 porciento di encuestadonan a raporta cu bai cu vakantie no tabata apropia (Q2-2021: 50 porciento). Consecuentemente, e indice di habito di consumidor tabata ta 94,1 den e di tercer trimester di 2021.
Informacion adicional riba e encuesta di confiansa di consumidor ta disponibel riba website di CBA.
[1] E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu consumidornan no ta ni optimista, tampoco pesimista, pero ta neutral den nan pensamento di desaroyo economico na Aruba. Entre 100 y 110, e indice ta mustra un situacion di optimismo den pensamento di consumidornan.
