Segun Algemene Rekenkamer Aruba AVP a atenta contra integridad --- Mike a drenta Gobierno hunto cu Henny na 1986 y a laba cara na 2009 --- Aruba atrobe ta wordo e-manipula pa ganashi politico di “happy few”
ORANJESTAD (AAN)- Abuso ta wordo haci contra Pueblo di Aruba, cu for di prome momento di su autonomia na 1986, a bira victima di e-manipulacion.
Awe un generacion nobo di Arubiano ta observa e menasa di algun sindicato di Gobierno, cu na vispera di un temporada di fiesta cu ya tabata dificil, kier orkestra mas problema pa Pueblo di Aruba.
Kico lo pasa cu Aruba dentro di algun dia, ningun hende sa ya cu ainda Covid-19 ta menasa mundo.
Aruba den un situacion dificil mester cana y mester bolbe na un normalidad dificil, cu no ta Covid-19 so a origina.
Covid-19 no tabata presente na Aruba na 1986, ora AVP a logra forma un gobierno di coalicion y a drenta e Status Aparte cu nan no kier celebra na Hulanda 1983, pasobra e no tabata nan logro.
Salida di Lago a bira nan oportunidad.
Henny Eman a forma un coalicion y Mike Eman a drenta Oficina di Gobierno como “back to back” di su ruman y den servicio di Gobierno.
For di e momento e problema, cu awe ta rementa den man di Aruba, a wordo crea.
Na 1996 Aruba a tende di e Plan di Sasaki pa alrededor di 30 Miyon Florin cu mester a drecha situacion na San Nicolas.
Miembronan di Parlamento di AVP nunca a haci uzo di nan derecho di atende e proyecto den Parlamento.
Tabata dia 8 di Maart 2004 cu bom a rementa.
Investigacion di Algemene Rekenkamer Aruba a duna como resultado cu a spart placa di Aruba sin consideracion y hasta na forma contra leynan, loke a haci cu finalmente e caso a cay den man di Huez, tres Ministro a wordo sentencia na castigo pero Henny Eman a sali liber pasobra no tabata tin cuenta anual.
Trias Politica a basha abou den e caso aki di corupcion den cual segun Algemene Rekenkamer Aruba, gobierno di Henny Eman a pone integridad politico na peliger.
E forma cu a presenta e caso den publico a haci cu Aruba no a realisa e tempo cu hasta Miembronan di AVP den Parlamento a permiti loke a pasa sin haci nan trabou, manera a wordo ripiti tempo di Mike Eman.
Aruba a keda sin placa. Aruba a cay den un crisis severo.
For di 2014 cu Hulanda a bati na porta, Aruba mester a tuma medidanan.
Si mira e rapport di 2014 encuanto economisacion cu mester tuma lugar den e aparato gubernamental publica dor di Sociaal Economische Raad, ta mira claramente cu mester a busca solucion pa e gastonan di personal di Gobierno tambe.
Na 2008 Mike Eman a logra laba cara di su partido den e scandal di Fondo di Desaroyo Nobo San Nicolas, cu reduccion di BBO na mitar loke a destrui e base financiero di Aruba.
Sindicatonan tabata na haltura ayera y awe di loke a pasa cu Aruba. Sindicatonan tabata sa kico tabata pasa cu e placa di Pueblo cu mester a paga nan salario.
Awe Aruba den un situacion dificil mester drenta futuro, cu no ta resultado di Covid-19 so.
E tabata resultado di un gobernacion den cual e gran mayoria di Aruba a wordo e-manipula loke a haci cu Mike por a dirigi Gobierno te na 2017, ora bom a rementa den su man y ni presupuesto el a laga atras.
Awe Aruba ta den tension cu menasa di sindicatonan di Gobierno cu kier mas placa.
Sindicatonan, cu tabata representa den e Conseho Social Economico di Aruba na 2014, ora a traha un rapport den cual a splica con Gobierno Mike Eman mester a economisa bou supervision di Hulanda.
Loke ta pasa awe no ta pone solamente Gobierno lomba contra muraya pero henter Aruba mientras mundo ainda ta na peliger di Covid-19.
Na final di Siglo 20, corupcion den Gobierno a marca e pais Aruba cu a bira victima di e-manipulacion!
