Consulado di Colombia ta impulsa programa di salud gratis pa comunidad Colombiano na Aruba

Paula A. Giraldo, multiplicadora di Colombia Nos Une:

ORANJESTAD (AAN):  Señora Paula A. Giraldo, multiplicadora di Colombia Nos Une, a anuncia dos proyecto nobo enfoca riba salud preventivo pa beneficia comunidad Colombiano residente na Aruba, specialmente esnan cu ta den situacion mas vulnerable y cu ainda no tin acceso na seguro medico di AZV.

   Segun Giraldo, actualmente tin aproximadamente 7.000 colombiano na Aruba, y aunke hopi ya a regularisa nan situacion migratorio, algun ainda no por registra pa beneficia di servicio di salud local. Pa responde na e necesidad aki, ya ta disponible un programa cu ta ofrece 500 limpiesa dental completamente gratis pa mucha, adulto, homber y muhe. Prioridad lo wordo duna na esnan cu ainda no tin cobertura medico.

   Interesadonan por registra facilmente door di e enlace publica den pagina oficial di Facebook di Consulado di Colombia na Oranjestad. Esnan cu ta wordo selecciona pa e servicio gratis aki, lo ser contacta pa agenda un cita. Y ta indespensabel pa trece cedula di ciudadania Colombiano.

   Ademas di e programa dental, Giraldo a confirma cu pronto lo habri un segundo convocatoria pa consulta medico gratis, incluyendo chekeonan preventivo, mamografia pa hende muhe y evaluacionnan pa muchanan y hende homber.

   Segun e multiplicadora, e iniciativa no solamente ta busca pa brinda atencion medico, sino tambe fortalece cultura di prevencion den comunidad.

   “Nos kier pa tur hende kita e cultura di warda te ora nan ta malo pa busca ayudo medico. E meta ta promove chekeonan preventivo pa detecta cualkier condicion na tempo,” Giraldo a indica.

   E proyecto ta forma parti di e esfuerso di Colombia Nos Une, un programa di Consulado di Colombia cu ta traha pa conecta y apoya Colombianonan cu ta biba den exterior, brindando orientacion y iniciativa social cu ta contribui na bienestar di nan comunidad.