Consul Luis Gustavo Serrano:
ORANJESTAD (AAN) Locual, concretamente, Consul General di Colombia na Aruba a anuncia den conferencia di prensa, Diaranzon, ta cu e Consulado di Colombia, ACNUR y VeneAruba, ta bay apoya e trayectonan 1, 2, y 3 den e proceso di regularizacion di Imigrantenan, y nan ta autoriza di parti di DIMAS, pa realiza e solicitudnan di permiso pa pidi e citanan y revisa e documentacion cu DIMAS ta exigi pa e tipo di permiso aki.
“Den e trayecto 4 tin un diferencia chikito. E solicitudnan mester wordo haci directamente den DIMAS. Sinembargo, e Consulado ta bay yuda desde VeneAruba. Esaki door di revisa previamente e documentacion cu ta wordo exigi pa e trayecto 4. Nos lo solicita e cita, y riba e fecha di e cita e persona ta acudi na DIMAS cu e documentonan cu, previamente, nos a revisa.
E bentaha cu esaki tin pa e Imigrantenan ta cu e dia cu nan tin e cita cu DIMAS, nan por ta sigur cu e informacion of rekisitonan cu DIMAS ta exigi nan, ta cumpli cu e rekerimentonan minimo, evitando retraso, perdidanan, y bolbe solicita un cita nobo.
Si nan bay solicita directamente na DIMAS, pero e documentonan no ta cumpli cu e rekisitonan, DIMAS ta debolbe nan y lo tin cu pidi otro cita, lo mester pidi tur e citanan necesario te cu e documentonan cumpli cu tur e rekerimentonan exigi pa DIMAS”, e consul a remarca.
El a reitera cu por pidi e cita directamente na DIMAS, pero tambe via e portal den e lied: “punto pa progreso”. El a subraya cu mester corda cu e tramite aki tanto na DIMAS como VeneAruba, ta totalmente gratis y relativamente simple; no ta rekeri di intermediario pa realiza e proceso aki.
“Esnan cu acudi na VeneAruba, nos operador logistic, lo haya e revision di e documentacion, orientacion cu ta hopi importante di cual por ta e solicitud mas conveniente den e caso di e persona. Un persona por solicita directamente na DIMAS, pero posiblemente e no sa cual di e 4 trayectonan ta esun mas conveniente p’e. Den DIMAS nos ta bay laga duna conseho (consultancy) riba cual ta e trayecto cu mas ta cumbini’e. Nos ta bay brinda apoyo manera mi a splica, cu agendamento di cita y e consehonan lo ta completamente gratis”, Consul Luis Gustavo Serrano a reitera.
