ORANJESTAD (AAN): Pa Diahuebs 9 di October venidero, e resort di mas nobo JOIA Aruba by Iberostar na Eagle Beach ta
preparando un estilo nobo di Job Fair cu a hala atencion mesora di perodistanan presente na un conferencia di prensa teni den nan Convention Center nobo.
Suzette Bareño kende ta director di Recurso Humano pa Iberostar Aruba, indicando cu e grupo aki ta consisti di JOIA Aruba by Iberostar, y tambe Tierra del Sol Golf Course. Dos propiedad hopi special, unda nan e empleadonan ta haci tur e diferencia. Na Iberostar nan ta convenci cu empleadonan ta e curason di nan exito. Nan ta compromete pa crea un lugar di trabao, unda tur hende ta sinti nan aprecia, balora, sosteni, y orguyoso di e trabao cu nan ta haci.
“Pa nos ta importante pa inverti den formacion, desaroyo di carera, y bienestar di empleadonan pa asina cada uno por crece hunto cu e famia grandi di Iberostar y pa aporta pa nos dushi isla di Aruba,” ta loke Bareño a splica.
E ta invita tur aplicante pa nan Job Fair cu ta bay wordo yama: “Ready, Set & Hired”. Esaki lo tuma lugar dia 9 di October, for di 10:00 am te cu 4:00 pm den nan Ballroom na JOIA Aruba. E entrada ta banda panort, pues cerca di Shoco Boulevard.
Loke ta haci e Job Fair aki unico, ta cu e aplicante por wordo contrata e Diahuebs ey mes. Nan tin diferente posicion habri, den diferente departamento, incluyendo di F&B, tambe Front Office, Cushina, Housekeeping, den SPA, y tambe vacatura na tanto JOIA Aruba y tambe Tierra del Sol Golf Course.
E proceso completo por dura kizas 1 ora, y e candidato cu ta cualifica por sali cu un oferta di trabao e mesun dia. Nan ta recomenda pa aplicantenan yega cu e documentonan aki, y bin prepara den bo mihor version pa bo ricibi un entrevista cu nan.
Documentonan: Corda cu bo por haya empleo e mesun dia ey, pues pesey ta importante pa bo trece e siguiente documentonan: (*) Un curiculo (CV) actualiza. (*) Un identificacion oficial valido. (*) Un permiso di trabao valido (si acaso esaki ta aplicabel). (*) Un carnet di salud si acaso bo ta interesa na traha den F&B of Cushina. (*) Dos referencia minimo pa asina por haci referencia di bo.
Resident Manager, Dominique Meyer na su turno a indica cu den foyer di Ballroom nan lo bay tin 5 diferente station pa e Job Fair. Uno pa Food & Beverage, uno pa Cushina, uno pa Front Office, uno pa Housekeeping, y uno dedica pa Tierra del Sol.
Cada station lo bay tin su propio espacio pa e aplicantenan por haya informacion di e puestonan habri. Pues canando rond nan por obtene diferente informacion y referencia. Unavez cu bo tin esaki, bo por drenta e Ballroom unda Hefenan di Departamento y tambe esnan di Recurso Humano lo tey, pa asina tene e entrevistanan pa mira si e aplicante ta fit den e puesto cu nan ta buscando. Asina lo sigui cu e proceso pa tuma e persona den servicio, y haya un trabao nobo, cu lo bay mehora bo condicion di bida y ambiente di trabao.
Segun Sra. Meyer, na Iberostar nan ta ofrece empleadonan diferente beneficio, manera programanan di bienestar, training, chens pa sigui crece, y beneficionan secundario, y lo mas importante, cu bo ta bira parti di un compania cu tin atencion pa su hendenan y pa medio ambiente, y cu dedicacion total pa sostenibilidad.
