ORANJESTAD (AAN): Riba Diaranson, e Consul General di Merca staciona na Curacao, esta Allen Greenberg, a manda un mensahe di despedida via DIARIO pa pueblo.
“Ami y mi casa Haruko pronto lo bandona Caribe Hulandes despues di dos aña bibando na Curacao. Hunto cu mi coleganan yen dedicacion aki na Consulado General, nos a haci nos best pa cumpli cu nos responsabilidadnan cubriendo no djis Curacao pero tambe Aruba, Bonaire, St. Maarten, St. Eustatius, y Saba, bao di e circunstancianan yen reto di un pandemia global sin precedente, cu a pone nan bao di sombra pa mas di mitar di nan tempo cu nan ta den funcion.
No obstante e pandemia, y den un sentido debi na dje, nan ta hopi orguyoso cu e team di Consulado General a logra toch cu e cooperacion di hopi hende riba e islanan aki. For di evacua ciudadanonan Mericano bek pa Merca, mientras yuda habitantenna pega di Curacao pa por yega bek, y tambe enfrenta tur e dificultadnan cu Covid-19 a trece pa cu e habitante- y viaheronan Mericano.
Na mesun momento, na un forma exitoso nan a promove inversion Mericano riba e islanan aki, y a yuda poblacionnan indocumenta haya cuido di salud.
Nan a habri un centro di informacion educacional na Aruba, pa asina studiantenan por tin mihor acceso na informacion corecto y fondo pa nan por bay studia na Merca.
E coleganan di DEA y tambe FOL na Aeropuerto di Hato na Curacao a persisti den e lucha duro pa stop narcotrafico, y e operacion di CBP Preclearance na Aruba a hunga un rol principal pa yuda turismo Mericano bin bek aki. E list ata sigui.
Durante e tempo aki, tur hende a siña cu dificultadnan por uni hende y ta haci nos mas fuerte. Trahando na Consulado di Curacao tabata un experiencia extremadamente positivo pa mi.
Como Consul General, mi a trata di yega na tur sector di poblacion di e isla pa profundiza e conexion cu Merca. Esaki ta e motibo di mas importante pakico e mision Mericano ta aki. Y esaki ta asina desde 1793, ora cu e Consul a establece su mes pa prome biaha na Curacao, of bek na 1776 ora cu St. Eustatius a bira e prome lugar den exterior cu a reconoce independencia di Merca.
Durante mi carera di mas di tres decada, mi a siña pa haci e lugar unda nos ta biba, pa bira nos hogar, y pa hendenan conoce mi famia. Como cu Curacao a bira nos berdadero hogar, y cu nos ta comparti e problema y alegria di e islanan aki cu nos amigo y bisiñanan, boso tambe a converti boso mes den nos famia.
Mientras nos ta bisa ayo na nos hogar, y su hendenan ta e lugar di mas duro den bida di servicio den exterior, mi kier a comparti un speranza cu mi a desaroya durante mi tempo aki.
Ta e hendenan mes! Mi a conoce asina hopi hende cu talento, energia, y creatividad riba e islanan aki. Nan a impresiona mi inmensamente, ya cu nan ta ciudadanonan mundial ehemplar cu ta papia varios idioma y ta parce di tin un genetica global mindset inclusive. Nan ta ser humano cu ta adapta nan mes increiblemente y ta yen di reflexion. Mi speranza ta cu e habitantenan di e islanan aki ta haci un poco mas esfuerzo pa yega na Merca. Ora cu mi ta mira e retonan cu Merca ta enfrentando awor, mi ta convenci cu nos tin hopi di siña di boso. Mi speranza ta cu nos lo por ta capaz di centra nos mes riba metanan comun y yuda otro mutuamente pa haci nos y nos pais mihor hunto mientras cu nos ta avanza.
El a bisa tambe cu State Departmet a anuncia un plan ambicioso pa construi un edificio moderno pa Consulado na Curacao, banda di e historico Roosevelt House unda e tabatin e privilegio di biba.
Riba e potret por mira Consulado Allen Greenberg riba e dia cu el a subi Christoffelberg.
