*Y pa no laga ATA mercadea e sector aki mas - ORANJESTAD (AAN): Greg Peterson di Aruba Birdlife Conservation (ABC) a reuni cu Formador Evelyn Wever-Croes y representantenan di formacion di Gabinete WCII.
Peterson a duna di conoce cu e intercambio a bay na un manera hopi profesional. A logra hinca un documento den otro cu ta contene 7 pagina cu un cantidad di puntonan.
E cantidad di topiconan ta varia entre integridad, e asuntonan grandi cu tin pa cu loke ta corupcion politico y desaroyo di real estate.
El a bisa cu tin 4 mil camber ainda cu ta bin pa Aruba y esaki ta encera cu 25 mil hende mas mester bin biba na e isla. Tin preocupacionnan grandi pa cu esaki.
Banda di esaki tin preocupacion pa loke ta e departamento di DIP unda hopi cos a tuma lugar y cu mester a bringa 20 caso caba den pasado pa por purba atende cu un ke otro.
A puntra Gobierno si nan ta dispuesto pa pone e departamentonan bao di un sorto di curatela y bay check con por pone e departamentonan funciona na un manera responsabel, s declara.
ABC a laga sa tambe cu nan ta hopi preocupa encuanto cierto documento cu no a wordo publica den pasado. El a referi na e documento di RWZI (rioolwaterzuiveringsinstallatie) y tambe e raport tocante e estado di e coralnan dilanti di e hotelnan.
A papia riba introduccion di un 'nature code of conduct' cu por tin den tur tipo di organisacion manera sector bancario, NV's y companianan grandi di Aruba.
Segun Greg Peterson tambe a conversa riba legislacion unda e ley ta un tiki anticua y unda tur dia tin hende ta destruyendo naturalesa, pero ta casi imposibel pa e autoridadnan por te hasta duna boet. Si por 'upgrade' esaki.
A papia riba reorganisacion di e departamento di Natuur en Milieu cu ABC no ta contento con esaki ta funciona y a bin cu un proposicion.
A propone pa elimina 'adventure tourism' na Aruba cu ta causando hopi daño pa loke ta ATV's, UTV's, jet skis, etc y pa puntra gobierno pa no laga Aruba Tourism Authority por mercadea e sector aki mas pa evita e destruccion continuo cu e ta causando na e isla, Greg Peterson a indica.
Campañanan di concientisacion tambe tabata un topico cu a bin dilanti pa loke ta e obhetonan manera piedranan, shells, coral cu e hendenan kier viaha cu ne. E campaña aki mester ta no solamente pa localnan, pero tambe pa turista.
Tambe a toca e tema di lama y parke marino. ABC no ta contento cu e diseño di e parke marino ya cu e no ta funciona. ABC kier un parke marino estilo Bonaire cu e mesun tipo di reglanan.
Kier wak si ta posibel pa haci un analisis di e daño cu wordo haci pa wak unda por bay drecha e coralnan bek. Podise cu conhuntamente cu Hulanda, a bisa.
