ORANJESTAD (AAN): E di tercer barco crusero di Richard Branson a keda cla! Su compania Virgin Voyages lo bay usa e prome dos pa nabega for di Miami.
E di tercer cu a keda cla, cu a haya e nomber ‘Resilient Lady’, lo bay usa Puerto Rico como su home-port pa asina haci viahenan pa parti zuid di Caribe. Esey ta inclui bishita na Aruba tambe pa fin di aña.
Siman pasa, e barco nobo aki a haci su pruebanan riba lama, despues di a nabega for di e fabrica di Fincantieri na Italia. Den siguiente lunanan e proceso di test lo keda cla, y e ora numa lo entrega esaki na Virgin Voyages. Nan prome viahe lo sali dia 14 di Augustus 2022 for di Atenas, Grecia.
E lo keda como 2 luna y mey den Mediteraneo, prome cu dia 1 di November e ta cruza Atlantico for di Portugal pa 11 dia y yega na Puerto Rico, pa asina cuminza cu varios itinerario di San Juan cuminzando 12 di November.
E lo ta encarga cu viahenan di Islanan den parti zuid di Caribe. Lo tin un ruta cu lo bishita Tortota (British Virgin Islands), Point-a-Pitre (Guadeloupe), Bridgetown (Barbados), Castries (St. Lucia), y St. John’s (Antigua & Barbuda).
E lo tin viahe di 7 anochi tambe na Lesser Antilles, bishitando Oranjestad (Aruba), Willemstad (Curacao), Fort-de-France (Martinique), y Basseterre (St. Kitts and Nevis).
Nan prome barco yama ‘Scarlet Lady’, y e di dos ta ‘Valiant Lady’. Ambos lo usa Miami como homeport y ta bay riba viahenan di sea 4-anochi of di 5-anochi. Barco number 4 lo keda cla na 2023, y esey lo ta uno pa adulto solamente.
E barco nobo di Resilient Lady cu lo bishita Aruba, tin 20 restaurant y snackbar abordo, inspira pa e mihor restaurantnan na mundo, y tambe tin diferente oferta di salud y bienestar fisico na e pasaheronan, incluyendo un Juice Bar.
https://diario.aw/categories/noticia/general/construccion-di-otro-crusero-di-virgin-voyages-a-keda-cla-y-lo-bishita-aruba-e-ana-aki#sigProId5a86f0d679