Ingeniero Victor Acosta di Palmaruba Group. ORANJESTAD(AAN): Palmaruba Group hunto cu Gobierno di Aruba a anuncia e proyecto residencial Caribbean Town Villas & Apartments situa den e bario di Eagle.
Ta trata aki di un proyecto di 330 unidad riba un tereno di aproximadamente 42.000 m2. E ta consisti di 4 edificio grandi di 7 piso cada un y 32 cas para riba nan mes. Esaki ta un inversion di mas of menos 65 miyon florin, basa riba financiamento local y dedica specialmente pa e mercado local tambe.
Ingeniero Victor Acosta di Palmaruba Group a splica cu e proyecto lo tin un duracion di mas of menos dos aña y mey y cu lo percura pa bastante cupo di trabao, sea directamente como indirectamente.
"Si tur cos ta bon, nos lo ta cla pa pone e prome piedra den mas of menos cuater luna", asina ing. Victor Acosta a sigura awe mainta cu un sonrisa grandi riba su cara. E proyecto aki ta canando pa tres aña caba y hunto cu DIP, DOW y Gobierno, a finalisa cu tur permisonan pa por anuncia e proyecto grandi aki. E intencion ta pa ehecutivonan hoben y tur otro hende por yega na nan propio cas of apartamento y asina biba independiente den un comunidad cu tin acceso na tur necesidad pa por biba trankil. Pa por a logra yega na un modelo di negoshi den cual por ofrece prijsnan mas abou pa e propiedadnan, a haya hopi sosten y cooperacion di gobierno pa por a yega na un tereno.
E proyecto di condominio ta un poco diferente na proyectonan existente awendia. E lo bira un comunidad cera, cu un cura y cu entrada cera y priva exclusivamente pa e residentenan
