Rossi Marchena, Presidente:
* Ya 2.260 carchi di voto a wordo entrega bek na Oficina di Censo
ORANJESTAD (AAN): Conseho Electoral a convoca un rueda di presa dialuna mainta den cuadro di e Eleccion Parlamentario cu ta bay tuma luga dia 6 di december proximo.
Rossi Marchena, Presidente di Conseho Electoral a duna detaye riba con ta bayendo cu e proceso electoral y kico por spera riba dia di eleccion.
Conseho Electoral ta contento con e proceso ta bayendo. Siman pasa tabatin un anochi informativo cu e miembronan di e urnanan. Cada urna tin 5 miembro. Tin 70 urna y 2 urna mobil. Hopi miembro di e stemlokaalnan a presenta y nan a participa na e anochi informativo aki, el a bisa.
Marchena a sigui bisa cu pa presidente di cada urna y e di dos candidato, e siman aki ta bay tin atrobe un dia informativo pa pone mas atencion riba e puntonan cu ta mas importante durante di dia di eleccion.
Pa loke ta e logistica, el a bisa cu e stemlokaalnan ta wordo prepara. A instala algun local caba. DOW ta encarga cu esaki.
E siman aki Conseho Electoral lo sali controla e stembureaunan pa wak si tur cos ta na ordo y conforme cu ley. El a referi na un punto importante y esaki ta esun di carchi di voto (oproepingskaart). A tuma nota cu algun carchi a bin bek y cu ta normal cu carchinan di voto ta wordo entrega door di Post Aruba.
E aña aki e total tabata un tiki mas halto: 2.260 carchi di voto cu a wordo entrega bek door di Post Aruba na e oficina di Censo.E motibo principal di esaki ta cu hopi di e casnan no tin un brievenbus pa asina e carchi por a wordo poni eyden. Ta logico cu no por a laga e carchi unda cu ta y conscientemente Post Aruba a entrega e cartanan bek, Rossi Marchena a indica.
Otro motibo ta cu e personanan no ta biba mas na e adres of cu den algun caya tin cachonan brabo ta cana rond y no por a haci entrega di e carchinan di voto, el a bisa.
Censo a coopera pa e votadonan por a cuminsa busca nan 'oproepingskaart' of un duplicado di esaki y Censo ta duna oportunidad pa durante e siman aki e votadonan por sigui busca nan carchi di voto of un duplicado, Presidente di Conseho Electoral a indica.
