Conseho di Ministronan di Reino a trata strategia di siguridad pa Reino completo

Premier Evelyn Wever-Croes

• Plan amplio traha pa cubri 2023 te 2029
• Plan di Accion y Maneho ta wordo integra aki 

ORANJESTAD (AAN)-  Nos siguridad no ta algo cu ta bin di su mes. E ta rekeri atencion continuo pa percura cu nos ta sigur y cu nos ta sigui sigur. Siguridad den un pais ta hopi importante pasobra sin siguridad, nos no por biba liber. E strategia di siguridad pa Reino Hulandes ta encera locual cu lo haci durante e proximo 6 añanan (2023-2029) na bienestar di siguridad nacional.

   Manera cu por tuma nota mundialmente tin cantidad di menaza contra di siguridad, den diferente aea. Tin tension geo politico y menaza militar door di entre otro e guerra na Ukraina.

   Tin diferente sorto di actividad criminal, pero tambe e pandemia y clima y desasternan natural por conduci na desrupcion di sociedad. E strategia di siguridad menciona “Veiligheidsstrategie” ta duna direccion na loke Reino ta haci riba e tema di siguridad nacional.

   Menaza contra siguridad no ta haci distincion di frontera, pues Reino Hulandes no ta impune contra cambionan tumando luga rond mundo. Siguridad nacional ta sinonimo cu siguridad internacional y vice versa.

   DIARIO ta corda cu recien mes, ex-president di Rusia, esta Dmitry Medvedev, a menaza di lo bay ataca Den Haag (Hulanda) usando Misilnan Hipersonico.  Pues e epoca pa tuma seguridad na serio, ta awor mes!  Esaki despues cu Corte Internacional cu sede na Den Haag a emiti ordo di aresto contra Vladimir Putin.

   Pues e ta sumamente  importante cu ta pone enfasis riba siguridad nacional y internacional den e strategia di pa Reino completo y pa conecta esaki na otro. E strategia di siguridad ta combina e asina yama Geintegreerde  Buitenland - en Veiligheidsstrategie (2018) y e Nationale Veiligheid Strategie (2019) hunto y ta contene plan di accion y maneho riba tocante diferente tema.

   Siguridad ta un tarea principal di gobierno, pero e ta rekeri ciudadanonan, companianan, organizacionnan y instacianan tambe, pa traha hunto y pa asina mitiga menazanan contra siguridad, cual ta locual cu e “Veiligheidsstrategie” di Reino ta contene tambe.