Conseho di Minister a declara 25 di juli como 'Dia di Pensionado'

Minister Ursell Arends durante celebracion di 35 aña di existencia di OPPA

ORANJESTAD (AAN):  Diasabra anochi Minister Arends tabata tin e placer y honor di celebra hunto cu OPPA, 35 aña representando nos adultonan mayor y defendiendo nan interes.

            No ta un secreto cu e cantidad di adulto mayor den nos comunidad ta creciendo y cu esey comunidad su deber cu nan tambe. Nos tin cu para keto na e adulto mayor cu na momento di yega na e edad di pensioen oficialmente, ta haci e traspaso di un bida den cual a traha y entrega pa su Pais, pa uno unda Pais ta traha y entrega bek na dje. Asina e tin espacio pa disfruta di e frutanan cu e la yuda planta den su comunidad.

            Minister Arends a expresa su gratitud profundo na e sirbidornan balente di pueblo cu ta forma parti di OPPA. Un plataforma cu ta aporta na participacion activo di e grupo importante cu ta nos adultonan mayor.

            Probechando di e momento festivo, Minister Arends a anuncia cu Conseho di Minister a declara 25 di juli como 'Dia di Pensionado', siguiendo e peticion di OPPA, y den alineacion cu e vision di Ministerio di Adultonan Mayor.

            Aruba asina ta uni tambe na e celebracion hunto cu hermana isla Corsou y Boneiro. Un decision cu segun e minister ta resona profundamente cu e compromiso pa honra nos adultonan mayor.

            Na mes momento, minister ta remarca cu e dia ta sirbi como reflexion riba e hecho cu ainda nos tin gruponan den comunidad, mayoria biaha migrantenan cu nos a invita pa yuda lanta nos Pais, pero cu no por beneficia di un pensioen, pues Gobierno di Aruba su trabounan pa cu tur nos adultonan mayor pensionado, no ta cla ainda.

            Minister Arends ta finalisa enfatisando cu "nos tin e deber na nos mes y na e generacionan cu ta bini despues pa crea un sociedad caminda sabiduria y experiencia di nos adultonan mayor ta sigui wordo aprecia y balora."