Conseho di Minister a aproba siguiente fase pa revitalisacion total di Wilhelminastraat

Minister Geoffrey Wever:

*Fase 3 ta encera embeyecemento di e zona comercial urbano 

ORANJESTAD (AAN): Conseho di Minister di Gabinete AVP-Futuro, riba peticion di Minister Geoffrey Wever, a duna luz berde pa continua cu e proyecto di revitalisacion di Wilhelminastraat y su cercania. Esaki ta un paso importante den e plan integral pa reanima nos centro di ciudad. “Revitalisa e centro di Oranjestad ta parti di e acuerdo di Gabinete AVP-FUTURO y cu e decision aki nos ta cumpli cu nos compromiso”, segun Minister Wever.

            Fase 1 a cuminsa na aña 2023 na e crusada di Wilhelminastraat cu Columbusstraat, culminando exitosamente cu e creacion di Plaza Comercio – un espacio urbano renoba, vibrante y funcional, cu a lanta un aire nobo pa comerciante y bishitante. Fase 2 a encera un pida mas largo di Wilhelminastraat, bay te patras na Lagoen, cubriendo e area na altura di Irenestraat y Caya Mario E. Harms. Aki a amplia parkeo, instala un zona pa taxi, mehora iluminacion y a continua cu e innovacion importante: stacionnan pa recarga auto electrico, cual pronto lo ser instala, lo permiti cuater (4) auto electrico carga simultaneamente. E fase aki a ser entrega oficialmente na december 2024 (pendiente instalacion di stacion di recarga).

            Fase 3 cu awo a wordo aproba den Conseho di Minister ta encera embeyecemento di e zona comercial urbano den ful Wilhelminastraat, y tambe incluyendo Klipstraat, Steenweg y Nieuwstraat.

            Dentro di poco lo sali un invitacion pa diferente architecto pa nan duna un oferta na Gobierno di Aruba pa prepara e diseno. Basa riba esaki Gobierno lo scohe e architecto y despues basa riba e diseno di e architecto lo prepara e bestek y tur documento pa e destaho publico tuma lugar.

            “Nos ta traha pa crea un Oranjestad vibrante, activo y sostenibel,” Minister Geoffrey Wever a declara. “E proyecto aki ta sostene e vision di Gobierno pa desaroya Oranjestad como un ciudad culinario, cu espacio pa comercio, recreacion y unda hende ta biba y traha.”