Jayburtt Dijkhoff, Instituto di Calidad:
ORANJESTAD (AAN) — Den su entrevista cu DIARIO, PhD. Jayburtt Dijkhoff, di Instituto di Calidad, a sigui splica cu pa e Sector di Salud Oral (Cuido di Boca), e desaroyo ta un poco mas complica, den sentido cu tin mas dentista cu locual e pueblo tin mester.
Dijkhoff a comenta cu no tur hende ta bishita nan dentista alomenos un bez pa aña y esey ta haci cu aworaki tin mas cu setenta y por wak tambe cu e ta pone un presion riba mercado, y ta haci cu mester mira un rato si ta habri mas universidad of si mester stimula mas den prevencion, y e ora ey por crea mas cupo di trabao.
“Esey ta un discusion politico, pero e discusion tambe mester tuma lugar den e ramo, pa wak den cual direccion nos tin cu bay y si nos ta bay trece mas yiunan di tera pa bin traha akinan, of nos ta want’e un rato, aki un diez aña cu mas baha cu pensioen, y e ora ey nos crea mas cupo di trabao”, Jayburtt Dijkhoff a comenta.
Esey ta un discusion andando, Dijkhoff a bisa, y e ta kere cu aki un par di luna cu nan tin mas claridad, por trece mas informacion, kico ta bay bira e direccion pa bay.
“Parti di e tarea di e Institucion tambe ta coordina e maneho, cu tur e stakeholders, y enberdad e punto mas principal ta: kico ta nos vision?, kico nos kier haci cu e sector di salud di boca? Pasobra e ta hunga un rol tocante higiene, y e salud en general di un persona, y vooral si hendenan ta haya sa di esaki ora ta hopi laat, of e ta haya un infeccion, dolor, cu no por drumi, etc. Y nos por actua mas den e kader di preveni cu cosnan no yega asina leu, anto despues ta costa Aruba hopi placa. Esaki nos kier plantie den e Kwaliteitsraad, hunto cu e organizacionnan tambe y al fin y al cabo esaki ta un maneho di Minister pa nos por canaliza con nos por sigui mehora e servicio”, PhD. Jayburtt Dijkhoff a conclui.
