ORANJESTAD (AAN): Un persona hopi keri cu casi semper bo tabata mire den Ling & Sons Supermarket, tempo cu e tabata bao maneho di famia Ling.
E noticia tristo a drenta Diahuebs merdia, cu e comerciante Yolanda Ling a fayece. E tabata un persona cu tin curazon di oro, hopi social, y semper cla pa yuda, of combersa riba tur sorto di topico. Yolanda hunto cu e ruman Clifton a opera e Supermarket pa hopi decada, te cu a bende esaki pa asina nan a tuma descanso y disfruta di nan nietonan.
Mey-mey di luna di Maart el a cuminza bira malo, y na comienzo di April a wordo hospitaliza y poni riba oxigeno. E malesa a complica y riba Diahuebs el a perde e bataya.
Yolanda a bay laga un famia grandi atras, incluyendo su yiunan Cliff Starke y tambe Sharlene Starke.
Na famia di fayecida, DIARIO ta extende su mas profundo palabra di condolencia.
