ORANJESTAD (AAN): Chris Goedhart di Departamento di Salud ta e Lider Operacional tras di e henter di campaña di vacunacion contra Covid-19.
Durante un conferencia diaranson atardi unda a anuncia oficialmente e 'Vacunathon', el a bisa cu pa loke ta e parti logistico di e 'vacunathon' e grupo meta cu tin ta pa tur persona di 18 aña bay ariba cu pa un of otro motibo no a registra of no a wordo vacuna ta duna e oportunidad pa haya e prome vacuna.
E weekend aki no ta pa personanan cu mester haya nan di dos vacuna. Tur persona cu a haya nan prome vacuna di biaha ta haya un afspraak pa e di dos shot y tin cu mantene na cierto protocolnan cu un minimo di 3 pa 6 siman entre e prome y e di dos shot, a remarca.
Goedhart a sigui bisa cu tur persona cu ta bin na remarke pa e vacuna ta personanan cu ta biba na Aruba. Esaki ta personanan residente cu ta inscribi na Censo cu tin AZV, pero tambe pa personanan cu ta biba mas cu 6 luna na Aruba. Akinan ta inclui personanan indocumenta cu mester presenta un pasport of un ID.
E vacuna no ta pa turistanan. Ta echt solamente pa personanan local, Goedhart a splica.
Ta bay tin suficiente vacuna disponibel pa vacuna 10 mil persona e weekend aki, e representante di DVG a duna di conoce.
