ORANJESTAD (AAN): Con e cifranan di AZV ta na e momentonan aki no ta conoci ainda. Esey ta algo cu AZV ta bay saca dentro di poco, asina e PR di AZV, Solange Tchong
a duna di conoce den entrevista cu DIARIO.
AZV a recientemente a ofrece Minister di Salud Dangui Oduber e relato financiero 2020. Nan a caba di entreg'e y ta pendiente pa saca mas informacion riba esey. AZV ta splica den e relato 2020 con dificil aña 2020 tabata pa motibo un banda di e impacto di Covid-19, Tchong a indica.
Di otro banda tambe AZV mester a para diferente proyecto of pone un rato pending pa ora e situacion mehora.
Ainda na 2021 ta trahando cu e efectonan di Covid-19, pero tambe di tur otro cos cu mester bay a evalua con ta bay sigui cu nan of no.
"Dus pa e banda ey nos por bisa cu bo ta stabil pa awor, pero bo tin cu spera cu no bin mas cos acerca si. Kiermen den cierto sentido nos por lora. Nos kier pa mas hende posibel registra y vacuna. Pakico? pasobra nos tin mester di e "herd immunity". Nos mester pa tur hende ta proteha anto e ora bo por recupera bo pais bek", el a declara.
Segun Solange Tchong, na final di dia e fondo di AZV un gran parti ainda ta depende di e entradanan di prima y e entradanan di AZV prima ta bin ora tin e economia ta draai. Ora cu tur hende ta trahando bek den sector turismo, cu ta e sector cu a wordo afecta mas hopi.
Esey ta e retonan cu tin, a expresa. Pa aworaki, mirando cu tin e sosten financiero di Hulanda, por bisa den cierto sentido cu e situacion di AZV ta stabil, pero mester keda sigui monitorea e consecuencianan di Covid-19 y tambe ta spera cu nada otro bin pasobra e ora esey atrobe lo bira un reto, Tchong a remarca.
