Conocido artista local Nelson Gonzalez a devela monumento na ciudad di Doral

Florida awor tin ‘Migrante Monument’

ORANJESTAD (AAN): Informacion for di Florida ta indica cu ciudad di Doral a honra e forza y determinacion di migrantenan, cu ta forma mayoria di habitante di e municipio aki, door di devela un scultura cu ta resultado di un proyecto di arte di dos aña, un monumento cu ta celebra e resiliencia, espirito empresarial, y contribucion di migrantenan na comunidad di Doral.

   Doral ta situa como 12 kilometer west di Aeropuerto Internacional di Miami.

   E proyecto aki cu a cuminza na 2022 cu un ‘Call for Art’ competitivo, a culmina den fin di siman cu a pasa cu develo di e ‘Migrante Monument’.  E structura di metal di 5 meter halto, cubri cu capanan di polvo di marmer y cement blanco, a wordo crea pa e artista venezolano Nelson Gonzalez di 45 aña, kende a emigra pa Aruba na aña 2003.

   Segun e artista Nelson Gonzalez, e obra aki ta un “forma autobiografico di mi integracion den Reino Hulandes”.  E scultura cu el a yama “un humanoid asexual’, ta wordo destaca pa dos elemento principal, esta un tas tipo diplomat y un avion di papel.

   Aki Nelson Gonzalez a splica cu e avion di papel “ta representa poeticamente e soño y aspiracionnan di infancia, cu hopi di nos ta hiba den nos como motivacion pa emigra.”  El a nota tambe e conexion simbolico entre Doral y su cercania di Miami International Airport.  E maletin ta refleha e identidad empresarial di e ciudad, destacando e creciente rol como un hub pa comercio.

   Alcalde Christi Fraga di Doral a describi e monumento como “un simbolo di speranza y unidad”, bisando cu e ta refleha e cubrimento diverso di comunidad di Doral.  El a bisa cu e obra aki ta capta e esencia di un ciudad unda personanan di tur clase social ta uni pa construi un mihor futuro.

   El a bisa cu Oranjestad, e capital di Aruba, y tambe Doral ta ‘Sister Cities’, cu ta fomenta relacionnan di cooperacion riba varios tereno, e.o. cultura, negoshi, y gobierno.  Danki na e asociacion aki, Gonzalez a haya sa di e competencia pa artistanan na Doral.

   Pa Nestor Gonzalez, no ta coincidencia cu su obra a gana e competencia, como cu e aspecto mas sobresaliente di cultura di Doral ta su historia di emigracion.  Esta cu 70% di su poblacion a nace den exterior.

   E presupuesto cu ciudad di Doral a pone pa e obra di arte aki tabata na 300.000 Dollar.  E scultura di Nelson Gonzalez a costa $275.000.

   “E contribucion cu e obra di arte aki ta ofrece ta e reconocimento di e recien historia di Doral, cu ta un ciudad cu a desaroya den ultimo 20 añanan, segun Nestor Gonzalez a indica.