ORANJESTAD (AAN): Riba Diadomingo mainta trempan, Prome Ministro Mike Eman a duna un relato caminda el a anuncia
e tristo informe cu e conocido Armando Boekhoudt, conoci como ‘Mando’ a fayece.
Eman a skirbi: “Na su hogar na Papaya, mi a disfruta hopi bes di e sonidonan dushi y calido di su caha di orgel, 'Nos Cultura' y hospitalidad di henter famia.”
Segun Prome Ministro, e musica di Mando a conta historia di nos pueblo, su sonrisa a refleha e alma bondadoso cu ta tanto típico di nos cultura Arubano.
Mando no tabata solamente un musico, sino un guardian di nos tradicion, un amigo cu su porta semper tabata habrí pa un bishita y un rato di alegria.
“Nos lo sinti su falta hondamente, pero e harmonia di su animo lo keda bibo den nos curason.” Prome Ministro a duna e mensahe final aki: “Amigo Mando, descansa na Paz den Reino di Señor. Hopi forza y consolacion pa su famia y pa tur e pueblo keri di Papaya y Paradera.”
E potret di recuerdo aki, pa cortesia Prome Ministro Mike Eman.
