Crisis di camber empeorando na Tera Friu
- E preocupacion kizas por afecta e studiante
ORANJESTAD (AAN): E scarcedad di camber pa studiantenan di Aruba cu ta bay sigui nan educacion na Hulanda, ta algo cu a cuminza presenta su mes na forma mas critico ya di 10 aña pasa caba. Como cu cada biaha Hulanda tabata sigui acepta refugiadonan y demas persona cu ta haya asilo politico di e.o. conflictonan na Medio Oriente, esaki a sigui empeora ultimo añanan.
Ni maske cuanto plan Den Haag a traha pa purba na acelera construccion di flatnan den cual por haya mas lugar pa studiante, no djis di Hulanda pero tambe di exterior, esaki a sigui empeora y awor ta na un nivel critico.
Esey no ta unico dolor di cabez pa haya camber, sino tambe cu ya desde 4 aña pasa e prijs pa huur di un camber simpel a subi cu promedio di 30 porciento y mas.
Pa tal motibo, alumnonan cu ta pensa di bay studia na Hulanda, tin di cuminza inscribi nan mes ya desde cu nan ta e.o. den klas di Havo-4 caba, of den VWO-5 caba. Esnan di Mavo tin di inscribi pa un camber desde 3e klas caba. Pero ultimo tempo, ni asina ta logra haya camber na tempo pa ora nan gradua y ta cla pa viaha pa Tera Friu.
Studiantenan cu siman pasa a viaha pa Hulanda, mayoria di nan a logra haya camber den e stad cu nan ta studiando, of den un stad bisiña. Tin algun cu no por a haya camber, y cu mayornan cu toch poder financiero, a haya apartamento pa huur pa promedio di 1.000 Euro bay ariba.
Toch den fin di siman, DIARIO a ricibi comentario di un lector femenino, kende a admiti cu e mes hunto cu henter su famia ta hopi preocupa con lo sigui cu nan yiu cu a caba di viaha pa bay studia na Hulanda.
E preocupacion di henter famia, ta cu nan yiu a logra haya un camber, pero cu e advertencia di awor caba cu e tin di cuminza busca di awor caba pa aña escolar 2026-2027 pa un otro camber. Pues e lo keda solamente un aña escolar den e camber ey por lo pronto.
Aunke e hoben a biaha toch basta trankiliza, sinembargo famia ta hopi preocupa. Pasobra nan tin miedo cu e “buskeda di camber” den proximo 10 pa 12 luna, lo bay ta un peso enorme pa e studiante cu tin di desvia di su estudio pa keda atende e ‘necesidad urgente’ ey.
E lector a bisa cu el a scucha e discurso di Ministro, cu ta haci comosifuera tur cos ta ‘koek en ei’, pero tin studiantenan cu ta bay cu incertidumbre y den un pais stranhero tin di haci e trabao dificil pa cada dia check si nan peticion di camber pa 2026 ta wordo honra of no, y cada biaha bay dedica tempo na esey.
Famia ta pensa cu esaki lo ta un distraccion enorme cu por perhudica e alumno, y pa tal motibo e ta haya cu ta necesario pa trece esaki dilanti pa asina tanto e Mentornan na Hulanda, como tambe esnan di Departamento di Enseñanza, y Ministerio ta na altura di un preocupacion enorme.
Ademas e famia a splica, cu nan no tin e poder financiero pa bay huur un apartamento pa 1.000 Euro bay ariba. Y kico lo socede otro aña cu bin sali na cla cu e studiante no por a haya ningun camber? Of si acaso e camber ta demasiado pica pa nan presupuesto? Preguntanan cu nan ta drumi tur anochi cu ne.
Mientras tanto nan ta sigui manda “pep-talk” cu nan yiu na Hulanda, pa asina e trata di pone su atencion riba tur asunto di scol cu pronto lo start, y no ta dune ningun indicacion di e preocupacion aki. Aunke nan sa cu den su curazon, e alumno tambe ta basta inkieto cu loke ta pasando eynan cu kizas pa 2026-2027 e lo keda sin dak riba cabez como studiante na Hulanda.
Den pasado a yega di tende hendenan bin cu sugerencia, pa Gobierno di Aruba sea cumpra of laga traha Studenten Flats den diferente ciudad grandi na Hulanda pa alumnonan di e isla por keda eynan. Pero a ser mustra e tempo aya, cu e idea aki lo tin un embergadura di gasto miyonario cu Gobierno no tin ningun presupuesto disponibel pe.
